Indapur Drought Update : इंदापूर तालुका दुष्काळग्रस्त जाहीर करावा; अन्यथा उपोषणाचा शेतकऱ्याचा इशारा

Pune News : फेर सर्व्हे करून इंदापूर तालुक्यात अति गंभीर स्वरुपाचा दुष्काळ जाहीर करावा या मागणीसाठी निरगुडे (ता इंदापूर) येथील शेतकरी भगवान बापू खारतोडे यांनी उपोषणाचा इशारा प्रशासनाला दिला.

याची प्रशासनाने तत्काळ दखल घेत खारतोडे यांना उपोषण न करण्याची विनंती केली. त्यावर खारतोडे यांनी आठ दिवसांत मागण्या मान्य न झाल्यास पुन्हा २३ नोव्हेंबरला आमरण उपोषण करण्याचा इशारा दिला आहे.

भिगवण सर्कलमध्ये अत्यल्प पाऊस होऊन देखील गंभीर स्वरूपाचा दुष्काळ जाहीर करण्यात आलेला नाही. प्रशासनाच्या अहवालानुसार बारामती तालुक्यात गंभीर दुष्काळ आणि शेजारच्या इंदापूर तालुक्यात अत्यल्प दुष्काळ असा विरोधाभास दिसत आहे. त्यामुळे इंदापूर तालुक्यात फेर सर्व्हे करून गंभीर स्वरूपाचा दुष्काळ जाहीर करावा.

तसेच चारा छावण्या अथवा चारा डेपो सुरू करण्याची मागणी पूर्ण न झाल्यास २३ नोव्हेंबर पासून पुन्हा आमरण उपोषण करणार असल्याचे भगवान खारतोडे यांनी सांगितले. याबाबतचे लेखी निवेदन खारतोडे यांनी तहसीलदार व तालुका कृषी अधिकारी यांना दिले आहे.