E-Pik Pahani : शेतकऱ्यांनी तत्काळ करून घ्यावी ई-पीक नोंदणी

Pune News : ‘‘खरीप हंगाम २०२३’ मध्ये मॉन्सूनचे आगमन उशिरा झाले. तसेच ऑगस्ट महिन्यात पावसाचा खंड पडल्याने दुष्काळसदृश परिस्थिती निर्माण झाली आहे. पंतप्रधान पीकविमा योजना व नैसर्गिक आपत्तीचे अनुदान देण्यासाठी शेतकऱ्यांनी मोबाइल अॅपद्वारे १५ ऑक्टोबरपर्यंत ई-पीक नोंदणी करून घ्यावी,’’ असे आवाहन कृषी विभागाने केले आहे.

‘‘पिकांची माहिती ऑनलाइन नोंदविण्यासाठी भूमिअभिलेख विभागाने ई-पीकपाहणीचा उपक्रम सुरू केला आहे. याद्वारे शेतकऱ्यांना मोबाइल अॅपवर शेतातील पिकांची नोंदणी करता येते. जिल्ह्यात मोठ्या प्रमाणात ई-पीक नोंदणी प्रलंबित आहे.

नैसर्गिक आपत्तीमुळे पिकांचे नुकसान झाल्यास व पिकांची नोंद असल्यास शेतकऱ्यांना नुकसानभरपाई अचूक व लवकर मिळते. पीक पेरणी अहवाल प्रक्रियेत शेतकऱ्यांचा सक्रिय सहभागामुळे कृषी पतपुरवठा सुलभ होतो. पीकविमा आणि पीक नोंदणी दावे निकाली काढण्याची प्रक्रिया सुलभ होते. अॅपवर नोंद असल्यास सरकारच्या विविध योजनांचा लाभ घेण्यास कोणतीही अडचण येत नाही,’’ असे जिल्हा अधीक्षक कृषी अधिकारी संजय काचोळे यांनी कळविले.