Crop Insurance : विमा कंपनी प्रतिनिधीने पैशांची मागणी केल्यास शेतकऱ्यांनी तक्रार करावी

Satara News : कृषी क्षेत्राच्या उत्पादन वाढीच्या दरामध्ये फळपिकांचा प्रमुख सहभाग आहे. फळपिकांचे बाजारमूल्य अधिक असल्याने शेतकऱ्यांना चांगले उत्पन्न मिळते. मात्र फळपिकाचे अपेक्षित उत्पन्न न आल्यास तोटाही मोठा असतो.

ही बाब विचारात घेऊन शेतकऱ्यांच्या फळपिकांना हवामान धोक्यांपासून विमा संरक्षण देऊन त्यांचे अर्थिक स्थैर्य अबाधित राखण्यासाठी पुर्नरचित हवामान आधारित फळपीक विमा योजना राबविण्यात येत आहे.

विमा कंपनी प्रतिनिधी पडताळणी करण्यास आल्यास संबंधित शेतकरी यांनी तत्काळ कृषी विभागाशी संपर्क करावा. विमा कंपनी प्रतिनिधींनी कोणत्याही प्रकारे पैशांची मागणी केल्यास तत्काळ तक्रार द्यावी. अशा विमा कंपनी प्रतिनिधी, कंपनीवर फौजदारी कारवाई करण्यात येईल, अशी माहीती जिल्हा अधीक्षक कृषी अधिकारी भाग्यश्री फरांदे यांनी दिली.

या योजनेअंतर्गत मागील तीन वर्षांमध्ये सहभाग घेतल्यांपैकी सुमारे २९ हजार बोगस अर्ज आढळून आले आहेत. त्या अनुषंगाने प्रधान सचिव (कृषी) यांनी मृग बहर २०२४ मधील १०० टक्के सहभागी अर्जांची क्षेत्रीय अधिकारी/कर्मचारी यांच्यामार्फत तपासणी करून त्याचा अहवाल सादर करण्याबाबत सूचित केले आहे.

प्रधान सचिव यांच्या आदेशानुसार जिल्ह्यातील मृग बहर २०२४ मधील सर्व बागांची पडताळणी कृषी विभागाच्या माध्यमातून पूर्ण झाली आहे, तथापि विमा कंपनी प्रतिनिधी शेतकऱ्यांच्या शेतावर अथवा निवासस्थानी जाऊन मी विमा कंपनीचा प्रतिनिधी आहे व शासनाच्या आदेशावरून आपल्या फळबागेची पडताळणी करण्यास आलो आहे, अशी बतावणी करून आपली फळबाग आहे, असा माझा अहवाल गेल्याशिवाय आपणास विमा भरपाई रक्कम मिळणार नाही, असे खोटे सांगून काही शेतकऱ्यांकडून पैसे मागत असल्याचे निदर्शनास आले आहे. ज्या ठिकाणी ही बाब निदर्शनास आली आहे, याबाबत विमा कंपनी प्रतिनिधी विरोधात रितसर पोलिस तक्रार दाखल झाली आहे.