Mulching Farming : शेतकऱ्यांची पॉली मल्चिंगला मागणी

Jalgaon News : खानदेशात कलिंगड, मिरची केळीसह अन्य भाजीपाला पिकांसाठी शेतकरी पॉली मल्चिंगला मागणी यंदा अधिक आहे. उत्पादन वाढीसह पाण्याची कटकसर करण्यासाठी शेतकरी पॉली मल्चिंगचा उपयोग पिकांत करीत आहेत.

मिरची पिकात जळगाव, धुळे व नंदुरबारात ९० ते ९५ टक्के पॉली मल्चिंगचा उपयोग दिसत आहे. यंदा खरिपात कलिंगडाची खानदेशात सुमारे ४०० ते ५०० हेक्टरवर लागवड होणार आहे. केळी उगवणीनंतर किंवा केळी रोपांची चांगली वाढ झाल्यानंतर त्यातही पॉली मल्चिंगचा उपयोग शेतकऱ्यांनी केला आहे.

केळीसह कलिंगड, टोमॅटो, मिरची आदी सर्वच पिके, क्षेत्रासाठी पॉली मल्चींगचा उपयोग होत आहे. तसेच सध्या काढणीवर असलेल्या सुमारे २५ ते ३० हजार हेक्टरवरील केळी पिकातही पॉली मल्चिंग आहे.

पुरवठादार अनेक

पॉली मल्चिंगचे दर मात्र स्थिर आहेत. २० ते २५ मायक्रोनचे मल्चिंग पेपर शेतकरी पिकांसाठी उपयोगात आणत आहेत. विविध कंपन्यांनी त्यांचा पुरवठा केला आहे. ४६५ ते ४५० मीटर व सव्वातीन फूट रुंद पॉली मल्चिंग पेपरचे दर ७२० ते ८०० रुपयांपर्यंत यंदा होते.

खर्च वाढतोय

मल्चिंग पेपर आच्छादनासाठी साधारणतः ३० ते ३२ हजार रुपये हेक्टरी खर्च येतो. यासाठी शासनाची अनुदान योजनादेखील उपलब्ध आहे. पण योजनेतून सर्व शेतकऱ्यांना अनुदान मिळत नाही. जे शेतकरी योजनेत पात्र ठरतात, त्यांना १६ हजार रुपयांपर्यंत हेक्टरी अनुदान मिळते. या योजनेसाठी कृषी विभागाशी शेतकरी संपर्क करीत असून, ऑनलाइन अर्ज करण्याच्या सूचना शेतकऱ्यांना दिल्या जात आहेत.

उत्पादनवाढीसाठी पसंती

मल्चिंग पेपर व ठिबक सिंचन वापरल्यामुळे शेतकऱ्यांना कमी पाण्यामध्ये चांगले उत्पन्न मिळत आहे. त्याचबरोबर पिकांच्या सोबतीने वाढणाऱ्या तणावरदेखील नियंत्रण राखता येत आहे. त्यामुळे तण काढणीवर होणारा शेतकऱ्यांचा खर्च यामुळे वाचत आहे.

पेपरच्या आच्छादनामुळे तापमान आणि आर्द्रता नियंत्रित होत असल्याने पीकवाढीला फायदा होत आहे. त्याचबरोबर किडींचा प्रादुर्भाव कमी करता येत आहे. अतिरिक्त पाऊस झाला तरी त्याचा फारसा परिणाम उत्पादनावर होत नसल्यामुळे मल्चिंगचा वापर अधिक प्रमाणात परिसरातील शेतकरी करू लागले आहेत.