Crop Damage Compensation : जामखेडमधील अतिवृष्टीग्रस्तांना अनुदानाची प्रतीक्षा

Jamkhed Crop Damge News : अतिवृष्टीने पिकांच्या झालेल्या नुकसानीचे पंचनामे (Crop Damage Survey) झाले. मात्र तीन महिने उलटूनही भरपाई (Compensation) न मिळाल्याने शेतकरी हवालदिल झाले आहेत. अजून किती दिवस प्रतीक्षा करायची, असा संतप्त सवाल त्यांच्याकडून उपस्थित करण्यात येत आहे.

जामखेड तालुक्यात ऑक्टोबर २०२२ मध्ये झालेल्या अतिवृष्टीमुळे पिकांचे मोठ्या प्रमाणावर नुकसान झाले होते. तसेच काही ठिकाणी अंशतः घरांची पडझड झाली. या नुकसानीचे प्रशासनाकडून पंचनामे करण्यात आले होते.

यामध्ये प्रामुख्याने सोयबीन, उडीद, मूग या पिकांचा समावेश आहे. बागायती आणि हंगामी बागायत पिकांमध्ये एकूण चार हजार १२९ शेतकऱ्यांचे दोन हजार पाच हेक्टर क्षेत्राचे नुकसान झाले आहे.

यात प्रामुख्याने मका, तूर, मिरची, वांगी, कांदा, टोमॅटो या पिकांचा समावेश आहे. याप्रकरणी पिकांच्या नुकसान भरपाई पोटी शासनाकडे जिरायतीी पिकांसाठी १६ कोटी ३१ लाख, तर बागायत पिकांसाठी पाच कोटी ४१ लाख, असे एकूण २२ कोटी रुपये सरकारी अनुदानाची मागणी करण्यात आली होती.

अंशतः पडझड झालेल्या ११ घरांसाठी नवीन निकषाप्रमाणे एक लाख ६५ हजार रुपये, वीज पडून बैलाचा मृत्यू झाल्याने त्यासाठी ३० हजार रुपये अनुदानाची मागणी करण्यात आली होती.

शासन निर्णयाप्रमाणे जिरायती पिकांसाठी प्रतिहेक्टरी १३ हजार ६०० रुपये, बागायत पिकांसाठी २७ हजार रुपये आणि फळ पिकांसाठी ३६ हजार रुपये याप्रमाणे अनुदान मिळणे अपेक्षित आहे.

अतिवृष्टीने झालेले नुकसान

महसुली गावे - ८७

पंचनामे - २३ हजार ६५६

नुकसान - १३ हजार ९९५ हेक्टर

भरपाईची मागणी - २२ कोटी रुपये

महसूलमंत्र्यांकडून नुकसानीची पाहणी

तालुक्यातील अतिवृष्टीमुळे पिकांच्या झालेल्या नुकसानीची महसूलमंत्री व पालकमंत्री राधाकृष्ण विखे पाटील यांनी प्रत्यक्ष पाहणी दौरा केला होता. त्यावेळी त्यांनी आढावा बैठकीत तातडीने पंचनामे करण्याच्या सूचना दिल्या होत्या.

त्यानुसार प्रत्येक गावात स्थानिक पातळीवरील तलाठी, ग्रामसेवक, कृषी सहायकांनी संयुक्त पीक नुकसानीचे पंचनामे करून, अहवाल सादर केले होते. मात्र त्याला तीन महिने उलटूनही शेतकऱ्यांच्या हातात मदत मिळाली नाही.