Kharif Sowing : कुठे वापसा तर कुठे अजून पावसाची प्रतीक्षा

Latur / Dharashiv News : दोन्ही जिल्ह्यात पावसाने जोरदार हजेरी लावली तरी काही भागात दररोज पाऊस पडत असून वापसा होत नसल्याने पेरण्यांसाठी शेतकऱ्यांना अजून हालचाल करता येत नाही तर काही भागात अजूनही पुरेसा पाऊस नसल्याने शेतकऱ्यांना दमदार पावसाची प्रतीक्षा आहे.

यामुळे पेरण्यांचा वेग मंदावला असून पावसाने उघडीप दिली तर वेग वाढेल, अशी आशा आहे. यात काही भागात कापूस पेरणी सुरू असून पाऊस थांबला तर आठवड्यात दोन्ही जिल्ह्यात पेरणीचा टक्का वाढू शकतो.

लातूर जिल्ह्यात जळकोट तालुक्यात अजूनही दमदार पाऊस झालेला नाही. उर्वरित दहा तालुक्यात १०० ते २१९ मिलिमीटर दरम्यान पाऊस झाला तरी काही तालुक्यात दररोज पाऊस पडत आहे.

यामुळे आधी पेरणीयोग्य पावसाची प्रतीक्षा शेतकऱ्यांना होती तर आता पेरणीसाठी वापसा होण्याची वाट शेतकरी पहात आहेत. पेरणीसाठी आवश्यक बियाणे व खतांची खरेदी झाली असून आता वापसा झाला की पेरणीची तयारी शेतकऱ्यांनी ठेवली आहे. जळकोट तालुक्यात काही भागात कापूस पेरणी सुरू आहे तर काही भागात पुरेशी ओल झालेली नाही.

उर्वरित दहा तालुक्यात उघडीप दिलेल्या भागात पेरण्या वेगाने सुरू आहेत तर काही भागात दररोज पाऊस येत असल्याने वापसाअभावी पेरण्या खोळबंल्याचे जिल्हा अधीक्षक कृषी अधिकारी आर. टी. जाधव यांनी सांगितले. धाराशिव जिल्ह्यात सर्व तालुक्यात दमदार पाऊस झाला असून पेरण्या वेगाने सुरू आहेत. जिल्ह्यात पाच लाख चार हजार ७३५ हेक्टवर खरीपाच्या पेरण्या होणार असून या आठवड्यात पेरण्याचा टक्का वाढणार असल्याचे जिल्हा अधीक्षक कृषी अधिकारी रविंद्र माने यांनी सांगितले.

दोन्ही जिल्ह्यातील पाऊस आणि पेरणी स्थिती अशी...

लातूर जिल्ह्यात एक ते १४ जून दरम्यान २४९.७० मिलीमीटर पाऊस झाला असून तो सरासरी पावसाच्या २० टक्के आहे. तर धाराशिव जिल्ह्यात २८५.२० मिलीमीटर पाऊस झाला असून तो सरासरी पावसाच्या २५ टक्के आहे. जिल्ह्यात १४ जूनअखेर तीन हजार ९८४ तर लातूर जिल्ह्यात चार हजार ५४५ हेक्टरवर पेरणी झाल्याची माहिती कृषी विभागातून मिळाली.