Sugarcane FRP : ऊस दर जाहीर करण्याची शेतकऱ्यांना प्रतीक्षा

Pune News : दौंड तालुक्यात चार साखर कारखाने आहेत. यापैकी तीन कारखान्यांनी ऊस गाळप हंगाम सुरू केला आहे. गाळप सुरू झालेल्या कोणत्याही कारखान्यांनी अद्याप ऊस दर जाहीर केला नसल्यामुळे शेतकऱ्यांना आता ऊस दराची प्रतीक्षा आहे. कारखानदारांनी उसाला प्रतिटन ३७०० रुपये भाव द्यावा, अशी मागणी शेतकऱ्यांसह विविध शेतकरी संघटनांनी केली आहे. मात्र प्रत्यक्षात निर्णय काय होतो याकडे सर्वांचे लक्ष लागले आहे.

तालुक्यात दौंड शुगर.प्रा . लि आलेगाव ता.दौंड ,एम .आर .एन.भीमा शुगर अँड पावर प्रा. लि. संचलित भीमा सहकारी साखर कारखाना लिमिटेड पाटस व श्रीनाथ म्हस्कोबा साखर कारखाना, पाटेठाण असे तीन कारखाने सुरू आहेत व अनुराज शुगर लि.यवत कारखाना बंद आहे. या कारखान्यांची ऊस गाळप चालू होऊन साधारण १५ दिवस उलटून गेले.

अद्यापही साखर कारखान्याने दर जाहीर केले नाहीत त्यामुळे शेतकऱ्यांमध्ये संभ्रमावस्था निर्माण झाली आहे प्रतिटन उसाला तीन हजार सातशे रुपयांचा दर द्यावा, अशी मागणी विविध शेतकरी संघटनांकडून होत आहे साधारणतः नोव्हेंबरपासून जिल्ह्यात ऊस गाळप हंगामाला सुरुवात झाली आहे.

मात्र, कारखानदारांकडून दर जाहीर न केल्याने मुळे शेतकऱ्यांची कोंडी कायम आहे, यामुळे शेतकऱ्यांकडून ऊस दर जाहीर करण्याची मागणी होत आहे. साखर कारखान्यांनी दर अद्याप जाहीर केला नसल्यामुळे गुऱ्हाळ चालकांनी २५०० ते २६०० रुपये प्रतिटन दर केला आहे. यामुळे सर्वसामान्य शेतकऱ्यांची पिळवणूक होत आहे.

कारखान्यांकडे शेतकऱ्यांचे लक्ष

दौंड तालुक्यातील शेतकरी एम.आर.एन.भीमा शुगर अँड पावर प्रा.लि. संचलित भीमा सहकारी साखर कारखाना लिमिटेड पाटस, दौंड शुगर प्रा.लि.आलेगाव कारखान्याला व श्रीनाथ म्हस्कोबा साखर कारखाना पाटेठाण या कारखान्याला ऊस पुरवठा करीत आहेत. गाळप हंगाम सुरू होऊनही कारखान्यांकडून ऊस दर जाहीर केले गेले नाहीत त्यामुळे कोणता कारखाना किती दर देणार आहे याकडे शेतकऱ्यांचे लक्ष लागले आहे.