Summer Jowar : उन्हाळी ज्वारीला हमीभाव नसल्याने शेतकरी आर्थिक अडचणीत

Yavatmal News : शासनाने खरीप व रब्बी हंगामांतील पिकांचे हमीभाव जाहीर केले असले, तरी उन्हाळ्यामध्ये मोठ्या प्रमाणात घेतल्या गेलेल्या उन्हाळी ज्वारीची खरेदी हमीभावाने केल्या जात नसल्याने शेतकऱ्यांचे आर्थिक गणित कोलमडले आहे. यंदा सोयाबीन, कपाशी व तुरीचा बहुतांश शेतकऱ्यांनी पेरा केला होता.

सोयाबीनवर आलेल्या येलो मोझॅकमुळे उत्पादनात घट आल्याने शेतकऱ्यांनी हरभरा पेरणी केली, परंतु पेरणीदरम्यान व पेरणीनंतर आलेल्या अवकाळी पावसामुळे बहुतांश शेतकऱ्यांचे हरभऱ्याचे पीक करपले. काहींनी अटोकाट प्रयत्न करून पिकाला वाचविले. परंतु पाहिजे त्या प्रमाणात यश आले नाही.

त्यामुळे शेतकऱ्यांनी हरभरा मोडून ज्वारी पिकाला पसंती देत पुसद तालुक्यात तब्बल एक हजार हेक्टरपेक्षा जास्त क्षेत्रात जानेवारी महिन्यात ज्वारीची पेरणी केली. पेरणीनंतर अस्मानी संकटामुळे ज्वारीवर रोगाचा प्रादुर्भाव झाल्यामुळे महागडे रासायनिक कीटकनाशके फवारून पीक वाचवावे लागले. अनेक भागात वादळी पावसामुळे पीक आडवे पडून नुकसान झाले. परंतु शेतकरी डगमगला नाही.

ज्वारीला असलेल्या बाजारभावामुळे आता आर्थिक तूट भरून निघेल या आशेने पिकाचे संगोपन केले. ज्वारी काढणी वेळी पुन्हा अवकाळीचे संकट आल्याने मजुरानींही आपली मजुरी वाढवली व शेतकऱ्यांची आर्थिक कोंडी केली. त्यावरही मात करून शेतकऱ्यांनी पीक काढणी केली. तब्बल १५ ते वीस क्विंटल एकरी उत्पादन काढून धान्य घरी आणले. त्या वेळी ज्वारीला ३१८० रुपये हमीभाव मिळेल अशी आशा होती.

शासन खरीप, रब्बी पेऱ्याची सातबारावर नोंद असलेल्या शेतकऱ्यांचीच नोंदणी करीत असल्यामुळे शेतकरी अडचणीत सापडले आहेत. या संधीचा फायदा घेत व्यापाऱ्यांनी ज्वारीचे भाव पाडले असून, तब्बल १८०० ते १९०० रुपये इतक्या कमी भावाने शेतकऱ्यांना ज्वारी विकावी लागत असल्याने शेतकऱ्यांचे मोठे आर्थिक नुकसान होत आहे. शासनाने भेदभाव न करता उन्हाळी ज्वारीलाही हमीभावाने खरेदी करून दिलासा द्यावा अशी शेतकऱ्यांनी मागणी केली आहे.