Sunflower Farming : सूर्यफुलाची शेतकऱ्यांना ओढ

Daund News : पारंपरिक सूर्यफुलाच्या तेलबियांचे पीक घेऊन त्याचे घाण्यावर भेसळविरहित तेल काढून त्याचा दैनंदिन खाण्यात वापर करण्याकडे कल वाढत आहे. त्याला शासनाच्या कृषी विभागाकडून प्रोत्साहन मिळत असल्याने दौंड तालुक्यातील शेतकऱ्यांनी तालुक्यात १६० हेक्टर क्षेत्रावर सूर्यफुलाच्या पिकाची लागवड केली आहे.

तालुक्यातील मळद या गावात साठ एकर सूर्यफूल पिकाची लागवड झालेली आहे. यंदा पावसाळा लवकर झाल्याने सूर्यफुलाचे पीक जोमात असून सध्या फुलोरा अवस्थेत आहे. फुलोऱ्यातील सूर्यफुलाचे पीक लक्ष वेधून घेत आहेत. ऊस पट्ट्यातील शेतकरीही पिकात बदल करून सूर्यफूल पिकाकडे वळत आहेत. त्यामुळे खाद्यतेल आयात करण्याचे प्रमाण कमी होऊ शकेल. मळद येथील सूर्यफूल पीक प्रात्यक्षिकाची पुणे विभागाचे सहसंचालक रफिक नायकवडी यांनी पाहणी करून शेतकऱ्यांना मार्गदर्शन केले.

केंद्र व राज्य सरकारने पारंपरिक तेलबियांच्या उत्पादनाला प्रोत्साहन देण्यासाठी विशेष प्रयत्न केले जात आहेत. या उपक्रमांतर्गत कृषी विभागाने नावीन्यपूर्ण बाब म्हणून महाराष्ट्र शासनाच्या राज्य पुरस्कृत एकात्मिक सोयाबीन व इतर गळीतधान्य उत्पादन वाढ मूल्यसाखळी विकास योजनेतून दौंड तालुक्यातील मळद या गावासाठी संकरित सूर्यफूल बियाणे व इतर निविष्ठांचा शेतकऱ्यांना पुरवठा करण्यात आला होता. सूर्यफूल बियाण्यांचा पुरवठा केलेल्या शेतकऱ्यांच्या बांधावर जाऊन मळद येथील कृषी सहाय्यक अझर सय्यद यांनी मार्गदर्शन केले.