Farmers Death : शेतकरी आत्महत्या रोखण्यात अपयश

Amaravati News : सरत्या वर्षात अमरावती विभागाचा शेतकरी आत्महत्येचा रोखण्यात सरकारी यंत्रणांसह समाजसेवी संस्था व स्व. वसंतराव नाईक शेतकरी स्वावलंबन मिशनला अपयश आले आहे. या वर्षभरात (जानेवारी ते नोव्हेंबर) तब्बल ३०६ शेतकऱ्यांनी कर्जापायी आत्महत्या केली. त्यापैकी केवळ ९१ आत्महत्याग्रस्त कुटुंबांना शासन मदत देऊ शकले आहे.

कर्ज काढून शेतीची लागवड केल्यानंतर नैसर्गिक आपत्ती व बाजारात शेतमाल मिळणारे न परवडणारे दर यामुळे आर्थिक गर्तेत सापडलेले शेतकरी नैराश्याने ग्रासले जात आहेत. वारंवार देण्यात येणाऱ्या कर्जमुक्तीनंतरही आत्महत्येचा प्रश्न कायमच आहे.

बियाण्यांसह खत व कीडनाशकांच्या वाढलेल्या किमती, मजुरीचे दर व हाती येणारी मिळकत याचा ताळमेळ जुळत नसल्याने कर्जफेडीच्या चिंतेने ग्रासलेल्या अमरावती विभागातील ९८५ शेतकऱ्यांनी या वर्षात आत्महत्या केली आहे.

शासनदप्तरी करण्यात आलेल्या तपासणीत ३०६ शेतकऱ्यांच्या आत्महत्या शासकीय मदतीसाठी पात्र ठरल्या आहेत. त्यातील केवळ ९१ कुटुंबांना शासकीय मदत देण्यात आली आहे. ३९२ प्रकरणांत अद्याप चौकशीच झालेली नाही. त्यामुळे ती प्रलंबित आहे तर २८७ प्रकरणे अपात्र ठरविण्यात आली.

बुलडाणा व वाशीम जिल्ह्यातील एकाही कुटुंबास मदत देण्यात आलेली नाही. अमरावती विभागात आत्महत्यांच्या सर्वाधिक ९२ घटना यवतमाळ जिल्ह्यातील आहेत. त्याखोलाखाल अमरावती जिल्ह्यात ८६ घटना आहेत. वाशीम जिल्ह्यात ही संख्या २९ असून बुलडाणा ५३ व अकोला जिल्ह्यात ४६ शेतकऱ्यांनी आत्महत्या केल्या आहेत.

विभागात एकूण ३०६ शेतकऱ्यांच्या आत्महत्या झाल्या असून दरदिवशी एक, अशी सरासरी आली आहे. ही संख्या कमी करण्यात किंवा हा कलंक मिटविण्यात शासनासह समाजसेवी संस्था व मिशन अपयशी ठरल्याचे यावरून स्पष्ट होत आहे.

विभागातील जिल्हानिहाय आत्महत्या

जिल्हा एकूण घटना पात्र अपात्र प्रलंबित मदत

अमरावती २१९ ८६ ४९ ८४ ७७

अकोला १४७ ४६ ३५ ६६ ३

यवतमाळ ३१७ ९२ ९१ १३४ ११

बुलडाणा २०८ ५३ ९२ ६३ ००

वाशीम ९४ २९ २० ४५ ००