Micro Irrigation Scheme : ‘सूक्ष्म सिंचन’ची व्याप्ती वाढवण्यासाठी प्रयत्नशील

Mumbai News : ‘‘प्रति थेंब अधिक पीक सूक्ष्म सिंचन योजनेतील सूक्ष्म सिंचन उत्पादक, वितरक आणि शेतकऱ्यांच्या अडचणी सोडवून या योजनेची व्याप्ती वाढविण्यासाठी शासन प्रयत्नशील आहे,’’ असे प्रतिपादन कृषिमंत्री धनंजय मुंडे यांनी केले

‘पर ड्रॉप मोअर क्रॉप'अर्थात प्रति थेंब अधिक पीक सूक्ष्म सिंचन या योजनेतील अडचणींबाबत इरिगेशन असोसिएशन ऑफ इंडियाच्या शिष्टमंडळाने बुधवारी (ता. १०) मुंडे यांची भेट घेतली. त्यावेळी ते बोलत होते.

इरिगेशन असोसिएशन ऑफ इंडियाचे अध्यक्ष झुंबरलाल भंडारी, उपाध्यक्ष के. एम. महामूलकर, सचिव संदीप जवळेकर, कमलेश दास, कृषी विभागाचे अधिकारी उपस्थित होते. मुंडे म्हणाले, ‘‘सूक्ष्म सिंचन योजनेचा केंद्र सरकारकडून देण्यात येणारा निधी लवकरात लवकर प्राप्त करून घेऊन त्याचे वितरण करण्यात येईल.

अनुसूचित जाती व अनुसूचित जमातींमधील शेतकऱ्यांच्या पूरक अनुदानात योजनेतील नियमावलीत बदल करून उत्पन्नाची अट शिथिल करण्याबरोबरच बिरसा मुंडा कृषी क्रांती योजनेअंतर्गत पूरक अनुदानाची कमाल मर्यादा वाढविण्यासाठी शासन सकारात्मक आहे.

महाडीबीटी पोर्टलवरील अडचणी सोडविण्यात येतील.’’ ‘‘इरिगेशन असोसिएशन ऑफ इंडियाला राज्यस्तरीय समितीमध्ये प्रतिनिधित्व देण्याबाबत वेगळा प्रस्ताव सादर करावा’’, असे आदेश मुंडे यांनी या वेळी दिले.