E-Sakal: मराठी वाचकांची पहिली पसंती 'ई-सकाळ'; जगात नंबर एक

Pune News: 'ई-सकाळ' मराठी वाचकांची पहिली पसंती ठरले आहे. केवळ राज्यातील किंवा देशातीलच नाही जगभरातील मराठी वाचकांनी 'ई-सकाळ' वर विश्वास दर्शविल्याच काॅमस्कोरमधून स्पष्ट झाले आहे. तंत्रज्ञान अन् नव्या माध्यमांचा योग्य वापर करत, ई-सकाळनं हे यश गाठलं आहे.

‘सकाळ’चे ऑनलाइन अंग असलेल्या `ई-सकाळ`ने नुकताच २५ वर्षांचा टप्पा पार केला. वाचकांना केंद्रस्थानी ठेवून आपला देदीप्यमान वारसा यशस्वीपणे पुढे घेऊन जात आहे. त्याला वाचकांचीही साथ मिळत आहे. मराठी माध्यमांमध्ये विश्वासार्ह आणि वेळेत माहीत वाचकांपर्यंत पोचविण्याची परंपरा 'ई-सकाळ'ने कायम ठेवली. प्रत्येक बातमी, अपडेट वाचकांना विश्लेषणासह 'ई-सकाळ' देत आहे. त्यामुळे वाचकांनी 'ई-सकाळ'ला जगात नंबर केले आहे. 

कॉमस्कोर हा जागतिक पातळीवर डिजिटल मीडिया विश्लेषण करणारा महत्वाचा प्लॅटफॉर्म आहे. कॉमस्कोरच्या ताज्या अहवालानुसार 'ई-सकाळ' मराठी वाचकांच्या गळ्यातील ताईत ठरले आहे. ‘ई-सकाळ’ला १३.५ दशलक्ष युनिक यूजर्सनी पसंती देऊन शिखरावर पोचवले आहे. 'ई-सकाळ' महाराष्ट्रातच नाही तर जगभरात सर्वाधिक वाचले जाणारे मराठी डिजिटल माध्यम ठरले आहे. तंत्रज्ञान अन् नव्या माध्यमांचा योग्य वापर करत, ई-सकाळनं हे यश गाठलं आहे.

सकाळ माध्यम समूहाला पत्रकारितेचा समृद्ध वारसा लाभला आहे. पत्रकारितेच्या क्षेत्रात तब्बल ९३ वर्षांचा दाडगा अनुभव आहे. आता सकाळ माध्यम समुहाच्या डिजिटल प्लॅटफॉर्मच्या प्रवासालाही पाहता पाहता २५ वर्ष पूर्ण झाली. गेल्या २५ वर्षापूर्वी सुरु झालेल्या ‘ई-सकाळ’ने नुकतेच रौप्यमहोत्सवी वर्षात पाऊल टाकले आणि याच वर्षात नवा मैलाचा टप्पा गाठला.

डिजिटल युगात इंटरनेट आणि स्मार्टफोनच्या वाढत्या वापरामुळे ऑनलाईन वाचकांची संख्या वाढत आहे. भारतीय भाषांमध्ये वाचकसंख्या झपाट्याने वाढली. मराठी वाचकही या आधुनिक डिजिटल मिडियाला मोठी पसंती देत आहेत. त्यातही विश्वासार्ह बातम्यांसाठी वाचकांनी ‘ई-सकाळ’ला प्राधान्य दिले आहे.