Tambadi Dam : ‘तांबडी’मुळे सिंचनाचा प्रश्‍न मार्गी

Mumbai News : तालुक्यातील डोंगर भागात असलेल्या तांबडी धरणाला १९९६ मध्‍ये मान्यता मिळाली होती‌. परंतु वन जमिनीमुळे हा प्रकल्पाचे काम प्रलंबित राहिले आहे. प्रकल्पासाठी जवळपास ३५ एकर जमीन संपादन होणार आहे. धरणामुळे तांबडी परिसरातील गावांना पिण्याचे पाणी उपलब्ध होणार आहे. शिवाय सिंचनासाठीही वापर होणार आहे.

तालुक्‍यात फलोत्पादन, कृषी पर्यटनाच्या दृष्‍टीने नवनवीन प्रयोग केले जात आहेत. त्‍यामुळे भविष्यात रोजगाराचे साधना उपलब्ध करण्यासाठी प्रयत्न करण्यात येत आहे. त्‍यासाठी पायाभूत सुविधांवर भर दिला जात असून यातून पर्यटनाला चालना मिळेल, तसेच स्‍थानिकांना रोजगार उपलब्‍ध होईल, असे आश्‍वासन खासदार सुनील तटकरे यांनी दिले आहे.

महाराष्ट्र सरकार मृदा व जलसंधारण विभागाच्या वतीने बांधण्यात येणाऱ्या तांबडी लघुपाटबंधारे योजनेचे भूमीपूजनप्रसंगी तटकरे बोलत होते. यावेळी राष्ट्रवादी प्रदेश सरचिटणीस विजयराव मोरे, राष्ट्रवादी जिल्हा सरचिटणीस सुरेश मगर, तालुका अध्यक्ष विनोद पाशिलकर, माजी उपसभापती रामचंद्र सकपाळ, जगन्नाथ कुंडे, किसन मोरे, सरपंच उद्देश देवघरकर, नवनीत डोलकर, किरण मोरे, हरेश नायणेकर, सरपंच परशुराम पवार आदी उपस्थित होते.

लघुपाटबंधारे योजनेअंतर्गत आधीच सर्वेक्षण झाले आहे. या प्रकल्पासाठी १० कोटींचा निधी उपलब्ध असून भूसंपादनासाठी आणखी १५ कोटींची आवश्यक आहे. संबंधित सर्व बाबींची पूर्तता झाल्यानंतर धरणाचे काम सुरू होईल, अशी माहिती जलसंधारण विभागाचे उपअभियंता अण्णा कदम यांनी दिली. तांबडी धरणास कालवाही प्रस्‍तावित आहे. त्‍यामुळे परिसरातील गावे, शेतकऱ्यांना फायदा होऊन सिंचनाखालील क्षेत्र वाढण्याची शक्‍यता वर्तवण्यात येत आहे.

असे असणार तांबडी धरण

तांबडी लघुपाटबंधारे योजना असे प्रकल्पाचे नाव असून धरणाची लांबी २९०.०० मीटर तर उंची ३०.५९ मीटर आहे. धरण क्षेत्रात १५७६ स.घ.मी. साठा उपलब्ध होणार आहे. धरणामुळे शेतकऱ्यांना फायदा होणार असून १४४ हेक्टर क्षेत्र सिंचनाखाली येणार आहे. यातून उजवा कालवा ४.२५ किमीचा असेल. बंधाऱ्याचा लाभ परिसरातील तांबडी, घोसाळे, कवळठे आदी गावांना होणार आहे.