Chana Disease : हरभरा पिकावर मर रोगाचा प्रादुर्भाव

Jalna News : जाफराबाद तालुक्यात मागील आठवड्यात झालेल्या मॉन्सूनोत्तर पावसामुळे हरभरा पिकाचे मोठे नुकसान झाले. अनेक ठिकाणी हरभरा पिकाला मर रोगाची लागण झाली आहे. शेतातील पीक अति पावसाने उबाळून येत आहे. या पिकाचे पंचनामे करून नुकसानभरपाई द्यावी अशी मागणी शेतकऱ्यांतून होत आहे.

जाफराबाद तालुक्यातील ब्रह्मपुरी, कुंभारझरी, टेंभुर्णी, नांदखेडा, मेरखेडा, गोपी, सवासिनी, भारज, सिपोरा अंभोरा, देवलझरी, वरुड, कोनड, बोरगाव, डावरगाव सावंगी, पापळ, भातोडी, खानापूर, वरखेडा, अकोला देव या भागात मोठ्या प्रमाणावर सोयाबीनच्या शेतात पिकाची लागवड केली जाते.

यंदाही सोयाबीनचे पीक नुकसानग्रस्त झाल्याने शेतकऱ्यांनी पिकाची काढणी करून हरभरा पिकाची पेरणी केली आहे.

जाफराबाद तालुक्यात रब्बीतील पेरणीचे क्षेत्र २८ हजार ३६४ हेक्टर आहे. यामध्ये हरभरा दहा हजार आठशे हेक्टरवर पेरला गेला आहे. रब्बीमध्ये सर्वाधिक पेरणी हरभऱ्याची झाली. परंतु अवकाळी पावसाने अनेक शेतात पिके उबाळून आली आहेत.

यामुळे पिकांची वाढ खुंटली, मर रोगाची लागण झाली आहे. महागडी औषधी फवारूनही पिकाचे नुकसान थांबविता येत नसल्याचे ब्रह्मपुरी येथील शेतकरी नीलेश शेवत्रे यांनी सांगितले.