Almatti Dam Water Release: अलमट्टी धरणातून ७० हजार क्युसेकने विसर्ग सुरू

Sangli News: पाणलोट क्षेत्रात मुसळधार पाऊस सुरू आहे. त्यामुळे कृष्णा नदी (कल्लोल बॅरेज) आणि घटप्रभा नदी (लोलासूर पूल) येथून पाण्याचा विसर्ग वाढला आहे. त्यामुळे अलमट्टी धरणाकडे प्रवाह वाढण्याची शक्यता असल्याने कृष्णा नदीकडे जाणारा प्रवाह बुधवारी (ता. १८) ५० हजार क्युसेकवरून ७० हजार क्युसेक इतका केला आहे. त्यामुळे अलमट्टी धरण क्षेत्रातील गावांना सतर्कतेचा इशारा देण्यात आला आहे. अलमट्टी धरण प्रशासनाकडून देण्यात आली आहे, अशी माहिती पाटबंधारे विभागाने दिली.

गेल्या आठ ते दहा दिवसांपासून पाणलोट क्षेत्रात मुसळधार पाऊस झाला आहे. त्यामुळे कृष्णा आणि वारणा नदीसह पंचगंगेच्या पाण्याच्या पातळीत वाढ झाली आहे. त्यामुळे कृष्णा नदी (कल्लोल बॅरेज) आणि घटप्रभा नदी (लोलासूर पूल) येथेही पाणीपातळी वाढली आहे.

अलमट्टी धरणात ६८.३४ टीएमसी म्हणजे ५६ टक्के इतका पाणीसाठा झाला आहे. २९ मे रोजी धरणात ४५.९५ टीएमसी इतका पाणीसाठा होता. अर्थात, वीस ते बावीस दिवसांत २२.३९ टीएमसीने वाढला आहे. कृष्णा नदी (कल्लोल बॅरेज) आणि घटप्रभा नदी (लोलासूर पूल) येथेही पाणीपातळी वाढली आहे.

सद्यःस्थितीला हिप्परगी बॅरेज येथे ७९८०० क्युसेकने पाण्याची आवक सुरू असून, ७९०५० क्युसेकने पाण्याचा विसर्ग सुरू आहे. तर अलमट्टी धरणात ८००८४ क्युसेकने पाण्याची आवक सुरू आहे. धरणातून ७० हजार क्युसेकने पाण्याचा विसर्ग सुरू आहे.

महाराष्ट्र आणि कर्नाटकच्या दोन्ही विभागांशी संवाद सुरू केला असून संभाव्य पूरपरिस्थिती निर्माण होऊ नये यासाठी आतापासून पाणी सोडण्याचे नियोजन केले असल्याचे सांगली पाटबंधारे विभागाने सांगितले आहे. दरम्यान, अलमट्टीतून ७० हजार क्युसेकने विसर्ग सुरू असल्याने धरण क्षेत्राच्या गावांना सतर्कतेचा इशारा दिला आहे. एकंदर पाऊस आणि पाण्याची आवक यावर पाण्याचा विसर्ग कमी अधिक केला जाईल, असेही सांगण्यात आले आहे.