Banana Farming : पुसदमध्ये केळी उत्पादनासाठी ‘क्लस्टर’ विकासाची संधी

Yavatmal News : पुसद परिसरात जमीन व पाण्याची उपलब्धता असल्याने केळी पिकाची लागवड करावी. केळीचे ‘क्लस्टर’ तयार करून आर्थिक सुबत्ता मिळवावी, असे आवाहन उपविभागीय महसूल अधिकारी आशिष बिजवल यांनी केले.

पुसद नजीकच्या पार्डी येथे चैत्रवेल फार्ममध्ये आयोजित शेतकरी संवाद कार्यक्रमात अध्यक्षपदावरून श्री. बिजवल बोलत होते. या वेळी मंचावर तालुका कृषी अधिकारी विजय मुकाडे, वसंत बायोटेकचे संचालक व केळी तज्ज्ञ प्रा. गोविंद फुके उपस्थित होते.

सुरुवातीला मान्यवरांच्या हस्ते केळी घडाचे पूजन करून पुष्पहार अर्पण करण्यात आला. या वेळी प्रयोगशील शेतकरी दिनकर गुल्हाने व शिवराम शेटे यांनी पाहुण्यांचे शाल, श्रीफळ व पुष्पगुच्छ देऊन स्वागत केले.

श्री. बिजवल यांनी पार्डी व परिसरातील केळी उत्पादक तसेच प्रगतिशील शेतकऱ्यांची संवाद साधला. केळी पीक लागवड करण्यापूर्वी शेतकऱ्यांनी तज्ज्ञांकडून प्रशिक्षण घ्यावे. यासाठी केळी तज्ज्ञ शेतकरी तसेच कृषी विभागाची मदत घ्यावी.

अभ्यासपूर्ण शेती फायदेशीर ठरू शकेल, याकडे त्यांनी लक्ष वेधले. शेतीमाल वाहतुकीस अडसर ठेवणारे पांदण रस्तेविषयक अडचणी त्यांनी शेतकऱ्यांकडून जाणून घेतल्या. पांदण रस्त्यासाठी आपण गाव पातळीवर तलाठी यांना सूचना दिल्या आहेत.

या बैठकीला आवश्यकता असल्यास आपण स्वतः येऊ, असे सांगून त्यांनी पांदण रस्त्यासाठी संबंधित सर्व शेतकऱ्यांनी एकत्रितपणे यावे, असे आवाहन केले. कार्यक्रमाचे प्रास्ताविक व सूत्रसंचालन आयोजक प्रा. दिनकर गुल्हाने यांनी केले. डॉ. माधवी गुल्हाने यांनी आभार मानले.

तालुक्यात दूध खरेदीसाठी चार ते पाच मोठ्या कंपनी उपलब्ध आहेत. त्याचा फायदा घेऊन शेतकऱ्यांनी दुग्धोत्पादन वाढवावे. पुसद येथील अमृतधारा कंपनीला दरवर्षी चार ते सहा कोटीचे दूध बाहेरून बोलवावे लागते. हा पैसा दुग्धोत्पादनाद्वारे आपल्याकडेच ठेवता येईल, असेही भुजबळ म्हणाले.

जमिनीचे आरोग्य राखा : विजय मुकाडे

शेतकऱ्यांनी जमिनीतून एकसारखी पिके घेताना अन्न मूलद्रव्य घटतात. त्याचा परिणाम उत्पादनावर होतो. स्वतः सोबतच जमिनीचे आरोग्य राखण्यासाठी शिका, असा सल्ला तालुका कृषी अधिकारी विजय मुकाडे यांनी दिला. जमिनीतील कर्ब वाढविण्यासाठी सेंद्रिय खतांचा वापर करा, त्यासाठी जोड धंदा म्हणून गुराढोरांचे पालन करा, फळबाग क्षेत्रात वाढ करा, असे त्यांनी सांगितले.