Pune News : प्रत्येक तालुका पंचायत समितीच्या माध्यमातून रोजंदारीवर गोठा, सिंचन विहीर, कुक्कुटपालन यांसह अनेक कामे मंजूर केली जात आहेत. महात्मा गांधी राष्ट्रीय रोजगार हमी योजनेच्या राज्यभरातील कुशल कामे, अर्धकुशल व अकुशल मजुरांचे वेतन तत्काळ मजुरांच्या खात्यावर जमा करावे, अशी मागणी शिवसेनेचे शिरूर तालुकाप्रमुख गणेश जामदार यांनी केली आहे.
चालू वर्षी प्रत्येक तालुका पंचायत समितीच्या माध्यमातून शासनाच्या कोट्यातून रोजंदारीवर अनेक कामे मंजूर केली जात आहेत. ही कामे पूर्णत्वास जाऊन देखील खात्यांवर मजुरीचे पैसे जमा न झाल्याने मजुरांच्या पदरी निराशा पडली आहे. शासकीय योजनांच्या माध्यमातून अनेक शेतकरी जॉबकार्ड काढून राष्ट्रीय रोजगार हमी योजनेअंतर्गत मजुरीवर आपली कामे करून घेत आहेत.
मात्र, वेळेत निधी न आल्याने ही कामे करताना सर्वसामान्य शेतकऱ्यांना स्वखर्चाने करून घ्यावी लागत असल्याने व रोजगार हमीचे पैसे वेळेत जमा होत नसल्याने शेतकऱ्यांमध्ये नाराजी दिसून येत आहे.
ग्रामीण भागातील मजुरांना रोजगार हमी हाच एकमेव आधार असल्याने योजनेअंतर्गत चालू असलेल्या कामांच्या मजुरांचे प्रत्येक आठवड्याला मजुरीचे पैसे त्यांच्या खात्यावर जमा करणे गरजेचे आहे. मात्र, मजुरी वेळेत मिळत नसल्याने रोजगार हमीसारख्या कामांमध्ये मजुरांची संख्या दिवसेंदिवस कमी झाली आहे.
शासन स्तरावरून चौकशी होणे गरजेचे
रोजगार हमीच्या माध्यमातून करण्यात येत असलेल्या कामांची सखोल चौकशी होणे गरजेचे आहे. योजनेतून देण्यात येणाऱ्या सिंचन विहिरीची कामे मजुरांच्या साह्याने होतात का, गोठ्यासाठी वितरित करण्यात येणाऱ्या निधीतून बांधकाम करण्यात आले आहेत की जुनेच गोठे दाखवून निधीचा अपहार होत आहे, याबाबत शासनस्तरावर चौकशी होणे गरजेचे आहे. योजनांचा लाभ घेण्यासाठी एजंट लोकांच्या माध्यमातून पैसे लाटत असल्याची दबक्या आवाजात चर्चा सुरू आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
