Rice Harvesting : भातझोडणीनंतर वैरणीला मागणी

Rice Crop Update : रसायनी परिसरात दुबार भाताचे पीक चांगले आले आहे. मात्र, वातावरणात जाणवणारा प्रचंड उकाडा, ढगाळलेल्‍या वातावरणामुळे पावसाची शक्यता असल्याने शेतकऱ्यांनी कापणीपाठोपाठ झोडपणीची काम सुरू केली आहे.

तसेच वैरणीचे (पेंढा) नुकसान होऊ नये म्हणून शेतकरी वैरणीची विक्री लगेच करत आहेत. तर वैरणीला दुग्ध व्यवसायिकांकडून मागणी असल्याने शेतकरी समाधान व्यक्त करत आहे.

रसायनी परिसरातील वडगाव, वासांबे मोहोपाडा, आपटे, चावणे, पंचक्रोशीतील शेतकरी पावसाळी खरिपाच्या हंगामात भाताचे पीक घेत आहे. तसेच परिसरातील सिंचनाचा आधार असलेले शेतकरी दुबार भात आणि भाजीपाल्याचे पीक घेतात.

यंदा भाताचे पीक चांगले आले असल्याने शेतकरी आनंदात आहे. परिसरातील काही शेतकऱ्यांची दुबार भातकापणी आणि झोडपणीची काम झाली आहे.

वैरणीचे नुकसान होईल, म्हणून झोडपणीनंतर लगेचच ६०० रुपये शेकडा दराने वैरण विकल्‍याचे शेतकरी खंडू धुरव, वामन दळवी यांनी सांगितले. चारा टंचाईवर मात करण्यासाठी दुग्ध व्यावसायिक आधीच वैरण खरेदी करतात.

शेतातच सहाशे रुपये शेकड्याने वैरण खरेदी केली, तर घरी जाईपर्यंत हमाली, वाहतूक भाडे आदी खर्च पकडून ८०० ते ९०० नऊशे रुपये शेकडा पडत असल्‍याचे दुग्ध व्यावसायिक कोकरे यांनी सांगितले.