Amaravati News : मॉन्सून लांबणीवर गेल्याने पेरणीची लगबगही मंदावली आहे. बियाणे बाजारात सध्या हवी तशी शेतकऱ्यांची गर्दी नसल्याने बाजार थंड आहे. तर यंदा सोयाबीनचा पेरा कमी राहण्याची शक्यता बियाणे विक्रेत्यांनी वर्तविली आहे. दरम्यान सोयाबीनच्या अधिक मागणी असलेल्या विशिष्ट वाणाचा तुटवडा असल्याने शेतकरी आल्या पावली परत जात असल्याचे चित्र बियाणे बाजारात आहे.
गत हंगामात सोयाबीनला बाजारात हमीदरही मिळू शकला नाही. सरासरी ३५०० ते ३८०० रुपयांपर्यंत बाजारात दर होते. तर नाफेडच्या शासकीय खरेदीचा लाभ पुरेशा प्रमाणात मिळालेला नाही. उत्पादनासाठी येणारा खर्च व बाजारात मिळणारी मिळकत, याचा ताळमेळ जुळत नसल्याने शेतकरी यंदा सोयाबीनचा पेरा कमी करतील, असा अंदाज विक्रेते व कृषी तज्ज्ञांनी वर्तविला आहे.
अमरावती जिल्ह्यात कापसाच्या बरोबरीत सोयाबीनची पेरणी होते. यंदा अडीच लाख हेक्टरवर सोयाबीनची पेरणी कृषी विभागाने अंदाजित केली आहे. त्यासाठी लागणाऱ्या बियाण्यांचे नियोजनही करण्यात आले असून महाबीजने यंदा बियाण्यांचे दर कमी केले आहेत.
बाजारात विविध वाणांचे बियाणे उपलब्ध झाले असले तरी शेतकऱ्यांनी यंदा अधिक सरासरी देणाऱ्या विशिष्ट वाणास अधिक पसंती देत मागणी केली आहे. या वाणाची २५ किलोच्या एका बॅगची किंमत ३ हजार ५०० रुपये आहे. एक किलो बियाण्यासाठी १४० रुपये मोजावे लागत असून महाबीजच्या बियाण्यांची किंमत ७३ रुपये किलो आहे.
मॉन्सूनचे आगमन लांबल्याने पेरण्यांची लगबग मंदावली आहे. हवामान खात्याने दिलेल्या अंदाजानुसार १३ जूननंतर पावसाच्या आगमनाची शक्यता असली तरी त्यामधेही विलंब संभव आहे. पेरणीयोग्य पाऊस नसल्याने शेतकऱ्यांनी पेरणीची घाई करू नये, असे आवाहन कृषी विभागाने केले आहे.
शेतकरी करताहेत चौकशी
पाऊस नसल्याने पेरण्यांची लगबग मंदावली आहे. शेतकरी बाजारात चौकशी करीत असून त्याला हवे असलेल्या बियाण्यांची मागणी करीत आहे. नेमक्या याच बियाण्यांची उपलब्धता कमी असल्याने बाजारात उठाव नाही. मॉन्सून लांबला असला तरी पुरेसा पाऊस पडल्यानंतर पेरण्यांना प्रारंभ होणार आहे. त्यावेळी बाजारातील गर्दीही वाढेल, असे कृषी बियाणे विक्रेत्यांनी सांगितले.
परमीटवरील बियाण्यांचाही परिणाम
लॉटरी पद्धतीने शेतकऱ्यांना परमीटवर अनुदानित सोयाबीनचे ६६ किलो बियाणे मिळत आहे. हे बियाणे शंभर टक्के अनुदानावर असल्याने त्यासाठी निर्धारित केंद्रांवर शेतकरी जात आहेत. त्याचा एकूणच परिणाम बाजारातील उपलब्ध इतर वाणांच्या विक्रीवर पडत आहे. त्यामुळे बाजारात शेतकऱ्यांची बियाणे खरेदीसाठी गर्दी अद्याप झालेली नाही.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.