MahaDBT : महा़डीबीटीकडून पूर्वसंमतीसाठी अडीच हजारांवर शेतकरी प्रतीक्षेत

Jalgaon News : कमाल कृषी योजनांचा लाभ देण्यासाठी शासनाकडून निर्मित महाडीबीटी पोर्टलकडून जिल्ह्यातील विविध योजनांसंबंधीच्या अर्जदारांना पूर्वसंमतीची प्रतीक्षा आहे. यामुळे शेतकरी योजनेतून यंत्रणा, अवजारांची खरेदी टाळत आहेत.

सूक्ष्मसिंचन, अवजारे, मल्चिंग, फळबागा व इतर योजनांबाबत जिल्ह्यातील अडीच हजारांवर शेतकऱ्यांना पूर्वसंमतीची प्रतीक्षा आहे. या शेतकऱ्यांना अर्ज सादर केल्यानंतर सोडत किंवा लॉटरीमध्ये समावेश झाल्याचे संदेश आहे.

यानंतर शेतकऱ्यांनी योजनेच्या लाभासंबंधी आवश्यक कागदपत्र महाडीबीटी पोर्टलवर अपलोड केली. ही कार्यवाही अनेकांनी चार महिन्यांपूर्वी केली आहे. काहींनी सहा महिन्यांपूर्वी कागदपत्र अपलोड केले आहेत. परंतु अद्याप पूर्वसंमती आलेली नाही.

यामुळे शेतकरी योजनेतून अवजारे, सूक्ष्मसिंचन यंत्रणा किंवा इतर बांबींची खरेदी टाळत आहेत. कारण पूर्वसंमतीच नसल्याने खरेदी करून काय करणार, ऐनवेळी शासनाने पूर्वसंमतीस नकार दिल्यास नुकसान होईल, वित्तीय बोजा वाढेल, असे शेतकऱ्यांचे म्हणणे आहे. शेतकरी कृषी विभाग, शासनाबाबत नाराजी व्यक्त करीत आहेत.

पूर्वसंमती महाडीबीटीने न दिल्याने शेतकरी संबंधित अवजारांची खरेदी टाळत आहेत. परिणामी शेती व्यवस्थापनात अडचणी येत आहेत. यातून शेतीमध्ये नुकसान सहन करावे लागत आहे. अनेकांनी शेती अवजारे खरेदी केलेली नाहीत.

यामुळे भाडेतत्त्वावर अवजारे घेऊन आपल्या शेतीची पूर्वमशागत, आंतरमशागत करावी लागत आहे. यामुळे योजनांचा लाभ वेळेत नसल्याने त्यांचा उपयोग काय, असा सवालही शेतकऱ्यांकडून करण्यात येत आहे.