Monsoon Rain In India : महाराष्ट्र व्यापल्यानंतर मागील सहा दिवसांपासून मॉन्सूनची वाटचाल ठप्प झाली आहे. तर मॉन्सून पोहचलेल्या बहुतांश भागातही समाधानकारक पावसाची प्रतीक्षा आहे. त्यामुळे देशात २९ जून अखेर ४२ टक्के पावसाची तूट नोंदवण्यात आली असून मागील वर्षीच्या या कालावधीच्या तुलनेत खरीप पेरणी २३ टक्के पिछाडीवर असल्याचे केंद्रीय कृषी विभागाच्या आकडेवारीवरून स्पष्ट झाले आहे..केंद्रीय कृषी मंत्रालयाच्या ताज्या आकडेवारीनुसार, २५ जूनपर्यंत खरीप पेरणीचे क्षेत्र १८२.७२ लाख हेक्टरवर पोहोचले आहे. गेल्या वर्षी याच कालावधीत २३६.४६ लाख हेक्टरवर पेरणी झाली होती. म्हणजेच यंदा पेरणीचे क्षेत्र सुमारे २३ टक्क्यांनी कमी आहे. हवामान तज्ज्ञांनी पुढील काळात यंदा सुपर एल निनो विकसित होण्याची शक्यता व्यक्त केल्यामुळे खरीप उत्पादनाबाबतची चिंता आणखी वाढली आहे. .मॉन्सून रेंगाळला मॉन्सून केरळमध्ये दाखल झाल्यानंतर प्रवास रेंगाळला होता. काही भागांत पावसाने चांगली हजेरी लावली, तर अनेक राज्यांमध्ये पावसाने खंड निर्माण झाले. त्यामुळे बहुतांश शेतकऱ्यांनी पेरणी पुढे ढकलण्याचा निर्णय घेतला. जुलै महिना हा खरीप पिकांच्या पेरणीसाठी सर्वात महत्त्वाचा मानला जात असल्याने पुढील काही दिवसांतील पावसाची स्थिती यंदाच्या हंगामाचे चित्र ठरवणार आहे. .तर भारतीय हवामान विभागाने पुढील काही दिवसांत गुजरात, मध्य प्रदेश, छत्तीसगड, झारखंड, बिहार, उत्तर प्रदेश, उत्तराखंड तसेच राजस्थान, हिमाचल प्रदेश आणि जम्मू-काश्मीरच्या काही भागांत मॉन्सून पुढे सरकण्यासाठी अनुकूल परिस्थिती असल्याचे म्हटले आहे. या भागांमध्ये चांगला पाऊस झाल्यास रखडलेल्या खरीप पेरणीला वेग मिळू शकतो. मात्र, पावसाचे असमान ववितरण कायम राहिल्यास खरीप उत्पादनावर परिणाम होण्याची शक्यता कृषी तज्ज्ञांनी व्यक्त केली आहे..Monsoon Rain: जुलैच्या पावसाचा अंदाज घेऊनच पेरणीचं नियोजन करा.पेरणीची स्थिती यंदा ऊस वगळता जवळपास सर्व प्रमुख खरीप पिकांची पेरणी मागील वर्षीच्या तुलनेत पिछाडीवर आहे झाली आहे. देशात भात, कापूस, सोयाबीन, भुईमूग, तूर, मका आणि इतर तेलबिया पिकांचे क्षेत्र मागील वर्षाच्या तुलनेत कमी आहे. खरीप हंगामाचे सरासरी क्षेत्र सुमारे १,१०४.४६ लाख हेक्टर मानले जाते. त्यापैकी आतापर्यंत केवळ १६.५ टक्के क्षेत्रावर पेरणी झाली आहे. गेल्या वर्षी याच कालावधीत ही टक्केवारी २१ टक्क्यांपेक्षा जास्त होती..कापूस, सोयाबीन पेरणी रखडलीकापूस आणि सोयाबीन या दोन प्रमुख पिकांच्या पेरणीला सर्वाधिक फटका बसला आहे. कापसाचे क्षेत्र २९.६६ लाख हेक्टरवर आले असून मागील वर्षी याच कालावधीत ४५.३६ लाख हेक्टर होते. म्हणजेच पेरा ३५ टक्क्यांनी पिछाडीवर आहे. .तर सोयाबीनची पेरणी ६.९२ लाख हेक्टरवर झाली असून मागील वर्षी या कालावधीत १९.९७ लाख हेक्टर पेरणी आटोपली होती. तसेच भुईमुगाचे क्षेत्र १५.२९ लाख हेक्टरवरून ८.८७ लाख हेक्टरवर पिछाडीवर आहे. महाराष्ट्र, मध्य प्रदेश, गुजरात आणि तेलंगणा या प्रमुख उत्पादक राज्यांमध्ये पावसाचा उशीर झाल्याने या पिकांच्या पेरा मंदावला आहे..कडधान्यांचा पेरा असमाधानकारकडाळी आणि तेलबिया पिकांची परिस्थितीही समाधानकारक नाही. कडधान्याखालील क्षेत्र २१.४६ लाख हेक्टरवरून १४.९२ लाख हेक्टर पिछाडीवर आले आहे. तर तेलबियांचे क्षेत्र ३६.४१ लाख हेक्टरवरून १६.९९ लाख हेक्टर पिछाडीवर आहे. तसेच तूरची पेरणी ८.४५ लाख हेक्टरवरून ३.५६ लाख हेक्टर पिछाडीवर आली आहे. उडीद आणि मूग पेरणीही पिछाडीवर आहे..Maharashtra Monsoon Update: समाधानकारक पावसाची प्रतीक्षा.भरडधान्यात किंचित वाढभरडधान्यांमध्ये केवळ ज्वारीच्या क्षेत्रात किंचित वाढ झाली असून बाजरी, मका आणि नाचणीच्या पेरणी पिछाडीवर आहे. तर मक्याची १५.७१ लाख हेक्टरवर पेरणी झाली असून मागील वर्षी याच कालावधीत १८.६१ लाख हेक्टरवर पेरणी झाली होती..भाताची लागवडही अपेक्षेपेक्षा कमी झाली आहे. गेल्या वर्षी याच कालावधीत ३४.४१ लाख हेक्टरवर भाताची लागवड झाली होती, तर यंदा ती २५.७५ लाख हेक्टरवर आहे. पावसाअभावी अनेक भागांमध्ये भाताच्या पुनर्लागवडीला उशीर झाला आहे..दरम्यान, कृषी विभागाच्या अधिकाऱ्यांचे म्हणणे आहे की, खरीप पेरणीचा मुख्य कालावधी अजून शिल्लक आहे. पुढील पंधरवड्यात मॉन्सून सक्रिय राहिला तर रखडलेली पेरणी वेगाने होऊ शकते. मात्र, गेल्या वर्षीच्या तुलनेत यंदा पेरणीचे क्षेत्र भरून निघणे कठीण असल्याचेही त्यांनी सांगितले आहे..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
