Political Parties Manifesto : महायुती, महाविकाससह वंचितच्या जाहीरनाम्यात शेतकऱ्यांना महत्व; पाहा कोणती आहेत आश्वासने?

Pune News : राज्यातील विधानसभा निवडणुकीची रणधुमाळी सुरू झाली असून प्रचार सभा सुरू झाल्या आहेत. याचदरम्यान विविध पक्षांनी आपला जाहीरनामा प्रसिद्ध केला. महायुती, महाविकास आघाडी आणि प्रकाश आंबेडकरांच्या वंचित बहुजन आघाडीने देखील जाहीरनामा प्रसिद्ध केला. यावेळी जाहीरनाम्यात शेतकरी, महिला, युवक मध्यस्थानी असल्याचे समोर आले आहे.

राज्यात महाविकास आघाडी आणि महायुतीत यंदाची निवडणूक होणार आहे. तर यावेळी वंचितसह तिसऱ्या आघाडीने विधानसभेसाठी शड्डू ठोकला आहे. यादरम्यान राज्यात शेतकऱ्यांसाठी होऊ घातलेल्या निवडणुकीच्या (Maharashtra Assembly Election 2024) पार्श्वभूमीवरून विविध घोषणा करण्यात आल्या आहेत.

महायुतीचा जाहीरनामा

महायुतीने कोल्हापूरच्या सभेत प्रचाराचा शुभारंभ करताना जाहीरनामा प्रसिद्ध केला. यामध्ये लाडकी बहीण योजनेसह शेतकऱ्यांची कर्जमाफी, वृद्धांना पेन्शन तसेच शेतकरी सन्मान योजनेची व्याप्ती वाढण्याची घोषणा करण्यात आली आहे. मुख्यमंत्री एकनाथ शिंदे यांनी, शेतकऱ्यांनी कर्जमाफी आणि शेतकरी सन्मान योजनेच्या अनुदानात भरीव वाढ करण्याची घोषणा केली. या योजनेतून आता शेतकऱ्यांना १२ हजार ऐवजी १५ हजार दिले जातील अशी घोषणा त्यांनी केली. याचबरोबर राज्यातील ४५ हजार गावांमध्ये पाणंद रस्ते केले जातील, शेत मालाच्या एमएसपीवर २० टक्के अनुदान देण्यासह वीज बिलात ३० टक्के कपात करून सौर आणि अक्षय उर्जेवर भर दिली जाईल अशी घोषणा केली.

महाविकास आघाडीची पंचसूत्री

महाविकास आघाडीकडून बुधवारी (ता.६) जाहीरनाम्यातून लोकसेवेची पंचसूत्री जाहीर करण्यात आली. यात देखील शेतकऱ्याला महत्व देण्यात आले आहे. महाविकास आघाडीचे सरकार आल्यास कृषी समृद्धी योजना लागू करू अशी घोषणा जेष्ठ नेते खासदार शरद पवार यांनी केली. तर या योजनेतून शेतकऱ्यांचे ३ लाखांपर्यंतचे कर्ज माफ केले जाईल, नियमीत कर्ज फेडणाऱ्या शेतकऱ्यांना ५० हजार प्रोत्साहन पर अनुदान दिले जाणार असल्याची माहिती शरद पवार यांनी दिली.

अजित पवार यांच्या जाहीरनाम्यात बोनस

यादरम्यान अजित पवार आणि उद्धव ठाकरे यांच्या शिवसेनेनं वेगवेगळे स्वतंत्र जाहीरनामे प्रसिद्ध केले. अजित पवार गटाने स्वतंत्र जाहीरनामा प्रसिद्ध करताना, शेतकऱ्यांची कर्जमाफी, तांदूळ उत्पादक शेतकऱ्यांना प्रतिहेक्टरी २५ हजार रुपये बोनस देण्याची घोषणा केली. शिवाय ग्रामीण भागात ४५ हजार पाणंद रस्त्यांचे बांधकाम करण्याचे आश्वासन देण्यात आले आहे.

वंचितच्या जाहीरनाम्यात हमीभाव कायदा

दरम्यान राज्यातील विधानसभा निवडणुकीच्या पार्श्वभूमीवर प्रकाश आंबेडकर यांच्या वंचित बहुजन आघाडीने देखील जाहीरनामा प्रसिद्ध केला आहे. यावेळी वंचितचे सर्वेसर्वा प्रकाश आंबेडकर यांनी, सोयाबीन आणि कापूस वेचणी करणाऱ्यां मजुरांना पाच हजार रुपये प्रति किलो वेचणी अनुदान, शेतमाल हमीभाव कायदा करण्यासह भाजीपाला, फळ, दूध आणि सर्व पिकांसाठी हमीभाव देवू असे म्हटले आहे. गायरान जमिनीवरील अतिक्रमणे नियमित करू असेही आश्वासन दिले आहे.