Solapur DCC Bank : संचालकांच्या अपिलावर चार आठवड्यात निर्णय घ्या

Solapur News : सोलापूर जिल्हा मध्यवर्ती सहकारी बँकेने काढलेल्या वसुली नोटीसीविरोधात बँकेचे माजी संचालक, माजी अधिकारी आणि माजी कर्मचारी यांनी सहकारमंत्री बाबासाहेब पाटील यांच्याकडे अपील केले आहे.

पण या अपिलावर त्यांनी कोणताच निर्णय घेतला नाही, या अपिलावर चार आठवड्यांच्या आत निर्णय घ्या, असे आदेश आता उच्च न्यायालयाचे न्यायमूर्ती अमित बोरकर यांनी दिले आहेत.

नियम डावलून झालेले कर्ज वाटप, कर्ज वसुलीसाठी संचालक, अधिकारी व कर्मचारी म्हणून कर्तव्यात केलेली कसूर यामुळे सोलापूर जिल्हा मध्यवर्ती सहकारी बँकेचे २३८ कोटी रुपयांचे आर्थिक नुकसान झाल्याने ३५ जणांना जबाबदार धरण्यात आले आहे. तसेच या नुकसानीची रक्कम व्याजासह वसूल करण्यासाठी जिल्हा बँकेने संबंधितांना वसुली नोटीस बजावली आहे.

या नोटीसीच्या विरोधात १५ हून अधिक माजी संचालक आणि अधिकाऱ्यांनी सहकारमंत्र्याकडे अपील केले आहे. पण या अपिलावर सहकार मंत्र्यांकडून कोणताच प्रतिसाद मिळाला नाही.

जबाबदारी निश्चितीमध्ये बँकेचे खासगी लेखा परीक्षक संजय कोठडिया यांनाही जबाबदार धरत वसुलीची नोटीस बजावली आहे. पण निर्णय न दिल्याने या संचालकांनी उच्च न्यायालयात धाव घेतली. त्यावर न्यायमूर्ती बोरकर यांनी हे आदेश दिले आहेत.