Banana Crop Damage : वादळी पावसाचा केळीला फटका

Nanded Banana News : मार्चमध्ये वादळी वाऱ्यासह गारपीट होऊन नुकसान झालेल्या शेतकऱ्यांना निसर्गाने पुन्हा एकदा प्रकोप केला आहे. रविवारी (ता. ४) मध्यरात्री झालेल्या वादळामुळे मुदखेड तालुक्यातील डोंगरगाव शिवारातील केळीच्या बागा आडव्या पडल्या आहेत. यामुळे शेतकऱ्यांचे मोठ्या प्रमाणात नुकसान झाले आहे.

मार्च महिन्यात १६ तारखेला बारड, डोंगरगाव, निवघा या भागांत मोठ्या प्रमाणात वादळी वाऱ्यासह अवकाळी पाऊस होऊन गारपीट झाली होती. या संकटातून शेतकरी सावरत असताना पुन्हा एकदा वादळाचा तडाखा बसला आहे.

मागील संकटातून काही प्रमाणात केळी बागा शिल्लक होत्या. पुन्हा रविवारी मध्यरात्री तुफान येऊन मुदखेड तालुक्यातील बारड परिसरातील डोंगरगाव, निवघा, वेजापूर पार्डी, बारड, खांबाळा, धनंज या शिवारात शेतकऱ्यांवर अस्मानी संकट ओढवले.

वाऱ्याचा वेग अधिक असल्यामुळे काही वेळातच होत्याचे नव्हतं झालं. निसवलेली केळी या वाऱ्यामुळे आडवी पडली. शेतकऱ्याने अधिकचा खर्च करून पोटच्या लेकरांसारखं जोपासलेली केळी बाग काही वेळातच आडवी झाली आहे.

यामुळे पाचशे हेक्टरपेक्षा अधिक क्षेत्रावरील केळी उत्पादकांचे मोठ्या प्रमाणात नुकसान झाल्याचा अंदाज आहे. नुकसानीबाबत प्रशासनाने तत्काळ दखल घ्यावी, अशी मागणी होत आहे.