Heavy rains : पितापूर परिसरात मुसळधारेने पिकांना फटका

Solapur News : अक्कलकोट तालुक्यातील पितापूरमध्ये रविवारी (ता. १) मध्यरात्री झालेल्या मुसळधार पावसामुळे शेतात पाणी साचल्याने अवघ्या १०-१२ दिवसांत काढणीला आलेले सोयाबीन व उडदाचे मोठ्या प्रमाणात नुकसान झाले आहे. रविवारी मध्यरात्री मुसळधार झालेल्या पावसामुळे हरणा नदीला पूरसदृश परिस्थिती निर्माण झाली आहे.

पितापूरसह, नन्हेगाव, आकतनाळ, बोरेगाव, हन्नूर व चपळगाव परिसरांतील अनेक गावांतील शेतकऱ्यांच्या शेतात गुडघाभर पाणी साचले आहे. त्यामुळे शेतकऱ्यांचे मोठ्या प्रमाणात नुकसान झाले आहे. पितापूर गावातील महबूब सगरी, लाडलेसाब सगरी, दिलीप व्हनमाने, भुताळी व्हनमाने, लिंबाजी व्हनमाने यांच्या शेतातील सोयाबीनचे मोठे नुकसान झाले आहे. तसेच यापैकी पीकविमा काढलेल्या अनेक शेतकऱ्यांनी नुकसानीबाबत विमा कंपनीला माहिती दिली. पण तिकडून अपेक्षित प्रतिसाद मिळाला नाही. कृषी आणि महसूल विभागाने या नुकसानीचे पंचनामे करावेत, अशी मागणी शेतकऱ्यांनी केली आहे.