Crop Damage : पिके पाण्यात, सर्व्हर डाउन अन्‌ शेतकरी हतबल

Solapur News : उत्तर सोलापूर तालुक्यातील परिसरात मोठ्या प्रमाणात पाऊस पडल्याने खरीप हंगामातील पिके पिवळी पडू लागली आहेत. जमिनीतील ओल न हटल्याने खरीप हंगामातील पिके धोक्यात आली आहेत. या पार्श्वभूमीवर पीक विमाधारक शेतकऱ्यांनी टोल फ्री क्रमांक १४४४७ वर कॉल केला असता पोर्टल बंद आहे, असे उत्तर मिळत आहे. यामुळे शेतकरी हतबल झाले आहेत.

गेल्या आठवडाभरात पावसाने उत्तर सोलापूर तालुक्यात जोरदार हजेरी लावली. या दमदार पावसामुळे तालुक्यातील ओढे, नाले भरून वाहत आहेत. उत्तर सोलापूर तालुक्यातील अनेक गावांमधील शेतांमध्ये पावसाचे पाणी साचल्याने उभ्या पिकांचे मोठे नुकसान होत आहे.

या नुकसानीची तक्रार दाखल करण्यासाठीचे पीक विम्याचे ॲपही सध्या काम करत नाही. या ॲपवर नुकसानीची तक्रारी नोंदविण्यास अडचणी येत आहेत. ७२ तासांच्या आत पिकांच्या नुकसानीची तक्रार न दिल्यास पीकविमा कंपनीकडून पंचनामा केला जात नाही. यामुळे शेतकरी हतबल झाला आहे.

सततच्या पावसामुळे उत्तर तालुक्यात मोठ्या प्रमाणात नुकसान झाले आहे. यामुळे सरकारने सरसकट पीक नुकसानीचे पंचनामे करून आर्थिक मदत तातडीने करावी, अशी मागणी शेतकरी वर्गातून होत आहे.