Crop Insurance Scheme : खरीप पीकविमा योजनेला शेतकऱ्यांचा कमी प्रतिसाद

Akola News : या वर्षी खरीप हंगामासाठी पीकविमा योजना पीक कापणी प्रयोगावर आधारित पद्धतीने लागू करण्यात आली आहे. या नव्या पद्धतीमुळे शेतकऱ्यांमध्ये काहीशी अनिश्चितता निर्माण झाली असून, विमा मिळेल की नाही या बाबत शंका उपस्थित होत आहेत. परिणामी शेतकऱ्यांचा योजनेत सहभाग कमी झाल्याचे दिसून येत आहे.

कृषी विभागाच्या १७ जुलैपर्यंतच्या आकडेवारीनुसार, बुलडाणा जिल्ह्यात ८७,५८३ अर्ज, अकोला जिल्ह्यात ३६,२४५ अर्ज, तर वाशीम जिल्ह्यात ४१,३११ अर्ज दाखल झाले आहेत. याची तुलना गेल्या वर्षीच्या आकडेवारीशी केली असता हा आकडा अत्यंत कमी असल्याचे स्पष्ट होते.

पीकविमा योजनेत २०२४ मध्ये बुलडाणा जिल्ह्यात ७ लाख ३४ हजार ४७ अर्ज, अकोला जिल्ह्यात ४ लाख २२,६६३ अर्ज आणि वाशीम जिल्ह्यात ४ लाख ६४ हजार ८६ अर्ज दाखल झाले होते. यंदा अद्याप दहा अकरा दिवसांचा कालावधी शिल्लक असून यंदाच्या अर्जांची संख्या थोडीफार वाढू शकेल. परंतु गेल्या वेळी जितके अर्ज आले होते, तेवढा आकडा गाठणे कठीण असल्याचे कृषी खात्याचे अधिकारीही सांगत आहेत. पीककापणी प्रयोगासोबतच पीकविमा

नुकसान भरपाई देण्यासाठी आधुनिक तंत्रज्ञानाचा वापर झाला तर मदतीचे प्रमाण याहीपेक्षा कमी राहू शकेल, अशी शंकासुद्धा घेतली जात आहे. योजनेत सहभाग वाढवण्याच्या उद्देशाने कृषी खाते शेतकऱ्यांना सहभागी होण्याचे आवाहन करीत आहे. त्यामुळेच पुढील काही दिवसांत अर्जसंख्येत लक्षणीय वाढ होईल, असा अंदाज अधिकाऱ्यांनी व्यक्त केला आहे.

मुदत ३१ जुलैपर्यंत

पीकविमा योजनेत सहभागी होण्यासाठी ३१ जुलै ही अंतिम मुदत आहे. काही दिवसांचा कालावधी उपलब्ध असल्याने अर्जसंख्येत वाढ होण्याची शक्यता वर्तवली जात आहे. कापणी प्रयोग आधारित पद्धतीमुळे प्रत्यक्ष नुकसानभरपाईची रक्कम ठरविण्याच्या प्रक्रियेबद्दल अनेक शेतकऱ्यांना माहिती नसल्याने ते निर्णय घेण्यास मागेपुढे करू लागले आहेत.

शिवाय मागील काही वर्षांत पीकविमा नुकसानभरपाई मिळण्यास झालेला विलंबसुद्धा यंदा प्रतिसाद कमी होण्यास कारणीभूत मानल्या जात आहे. मागील हंगामातील नुकसान भरपाईची मदत अद्यापही रखडलेली आहे. शेतकरी सातत्याने पीकविमा कंपनी, कृषी विभागाकडे या मदतीची मागणी करीत आहेत.