Unseasonal Rain : अवकाळी पावसामुळे उन्हाळी पिकांचे नुकसान

Akola News : पश्‍चिम विदर्भातील अकोला, बुलडाणा आणि वाशीम जिल्ह्यात मंगळवारी (ता. ९) सायंकाळी अवकाळी पाऊस, वादळ तसेच काही ठिकाणी गारपीट झाली. त्यामुळे उन्हाळी पिकांचे मोठे नुकसान झाले आहे.

अकोला जिल्ह्यात अवकाळी पाऊस, तर तेल्हारा, अकोट, पातूर, बाळापूर व मूर्तिजापूर तालुक्यांना वादळाचा फटका बसला. जिल्ह्यात उन्हाळी हंगामात ज्वारीची लागवड झाली असून, हे पीक जमीनदोस्त झाले. बाळापूर तालुक्यात लिंबू बागांमध्ये नुकसान झाले.

शिवाय गहू, ज्वारी, कांदा, तीळ पिकांचेही नुकसान झाले. बाळापूर तालुक्यात सोंगणीला आलेल्या ज्वारी, कांदा आणि गहू पिकांचे अतोनात झाले. निंबा, उरळ, हाता, अंदुरा, टाकळी, मोरगाव (सादीजन) या भागांना पावसाने झोडपले.

वाडेगाव परिसरात लिंबू बागांना वादळी वाऱ्याने नुकसान पोहोचवले. सध्याचा बहर गळाला. तेल्हारा तालुक्यात पिकांचे नुकसान झाले. माळेगाव बाजार परिसरात वीज पडल्याने नऊ मेंढ्यांचा मृत्यू झाला.

वाशीम जिल्ह्यात मालेगाव, मंगरूळपीर, रिसोड तालुक्यात काही गावांत जोरदार पाऊस झाला. मंगरुळपीरमधील हिरंगी, शेलुबाजार, सोयता नागी येथे वादळी वाऱ्यासह पाऊस झाला. सायखेडा येथे गारपीट झाली.

भुईमूग, कांदा, भाजीपाला, संत्रा या पिकांची मोठी हानी झाली. रिसोड तालुक्यातील खडकी (सदार), करडा, तांदळवाडी आदी गावांना वादळी वाऱ्यासह गारपिटीचा तडाखा बसला. खडकी (सदार) येथील शेतकरी शंकर सदार यांचा बियाण्याचा कांदा जमीनदोस्त झाला.

बुलडाणा जिल्ह्यात ३४७५ हेक्टरवर पिकांचे नुकसान झाल्याचा प्राथमिक अंदाज आहे. यामध्ये सर्वाधिक २८०० हेक्टर नुकसान खामगाव तालुक्यात झाले आहे. यात मका, ज्वारी, गहू, भुईमूग, कांदा व फळपिकांचा समावेश आहे.

याशिवाय मोताळा ११९, मलकापूर १७८, नांदुरा २५९, मेहकर येथे ११७ हेक्टरवर पिकांचे नुकसान झाले आहे.खामगाव, जळगाव जामोद, संग्रामपूर, नांदुरा तालुक्यांमध्ये धुमाकूळ घातला. खामगाव तालुक्यात गणेशपूर, लोखंडा, वझर, शिराळा परिसरात गारपीट झाली.