Crop Cluster Farming : वेगवेगळ्या पिकाचे स्वंतत्र क्लस्टर करून मार्गदर्शन करू

Jalna News : शेतकऱ्यांनी प्रतिसाद दिल्यास वेगवेगळ्या पिकाचे वेगवेगळे क्लस्टर करून जिल्ह्यातील सर्व पीक घेणाऱ्या शेतकऱ्यांना कृषी विभागातर्फे पूर्णपणे मार्गदर्शन करण्यात येईल, असे आत्माचे उपप्रकल्प संचालक अमोल आगवान यांनी सांगितले.

जालना जिल्ह्यातील ॲग्रोव्हिजन गटशेती संघाच्यावतीने प्रत्येक महिन्याच्या ९ तारखेला आयोजिण्यात येणारे एप्रिल महिन्यातील नियमित मासिक चर्चासत्र बुधवारी (ता. ९) बदनापूर तालुक्यातील वरुडी येथे उत्साहात पार पडले.

वरुडी येथील शेतीनिष्ठ शेतकरी जयकिसन शिंदे हे विकतच्या पाण्यावर उत्कृष्टरीत्या जोपासत असलेल्या डाळिंब बागेत शिवारफेरी घेऊन तेथेच चर्चासत्राला सुरवात करण्यात आली.

यावेळी आत्मा जालन्याचे उपप्रकल्प संचालक श्री. आगवान यांच्यासह बदनापूरच्या कृषी विज्ञान केंद्राचे प्रमुख डॉ. सचिन सोमवंशी, उद्यानविद्या विषय विशेषज्ज्ञ डॉ. दीपक कच्छवे यांनी उपस्थित शेतकऱ्यांना बहुमोल मार्गदर्शन केले. डॉ. सोमवंशी यांनी पीएम प्रणाम योजना विषयी माहिती दिली.

डॉ. कच्छवे यांनी उन्हाळ्यात फळबागेत कमीत कमी रसायनाचा वापर, पाणी बचत, मल्चिंग, तुषारचा वापर, सरी वरंबा आड पाणी आदींची शिफारस केली.

ॲग्रोव्हिजन गटशेती संघांचे संस्थापक प्रमुख संजय मोरे पाटील, कृषी विज्ञान केंद्र बदनापूरचे कैलास सुदेवाड, दहिगावचे नंदकिशोर देशमुख, माळी टाकळीचे गणेश बुरकूल, वडगाव वखारीचे रामप्रसाद खैरे, सपकाळ जळगावचे दिलीप सपकाळ, कल्याणी करजगांवचे संतोष बोरसे, बाजार गेवराईचे कृष्णा कान्हेरे, वाकूळणीचे सोमनाथ अवघड, बाजार वाहेगावचे बळिराम काळे, शेख जाकीर पटेल, वरुडीचे जयकिसन शिंदे, बाबासाहेब शिंदे, रमेश शिंदे, भास्कर शिंदे, काकासाहेब काकडे यांनी अनुभव सांगितले.