Irrigation Scam : सूक्ष्म सिंचन घोटाळ्यात अधिकाऱ्यांविरुद्धही गुन्हा

Buldana News : तालुक्यात सूक्ष्म सिंचन साहित्य वितरणात गेल्या काळात कोट्यवधी रुपयांचा घोळ समोर आलेला आहे. साहित्याची विक्री न करताच संगनमताने विक्रेत्याने अधिकची देयके काढली असल्याचे चौकशीत समोर आले होते.

या प्रकरणात बऱ्याच काळानंतर आता तालुका कृषी अधिकारी व अन्य एका कृषी अधिकाऱ्याविरुद्ध पोलिसांनी गुन्हा दाखल केला आहे. वर्षभरापूर्वी हे प्रकरण चव्हाट्यावर आले. कृषी साहित्य विक्रेता व तीन कृषी कर्मचाऱ्यांविरुद्ध यापूर्वीच कारवाई करण्यात आली होती.

या प्रकरणाची फिर्याद तेव्हा तालुका कृषी अधिकारी वसंत राठोड यांनी दिली होती. आता त्यांनाही या प्रकरणात आरोपी करण्यात आले आहे. २०२१-२२ या वर्षात जवळपास अडीच कोटी रुपयांचे कृषी साहित्य वितरण करण्यात आले.

हे वितरण चुकीच्या पद्धतीने झाल्याचे खात्यांतर्गत चौकशीतून स्पष्ट झाल्यानंतर या प्रकरणी तेव्हा सिंदखेडराजा पोलिस ठाण्यात कृषी विक्रेता सुरेश चव्हाण व तीन कृषी कर्मचाऱ्यांविरुद्ध गुन्हा दाखल करण्यात झाला होता.

मंगळवारी (ता. ७) पुन्हा या प्रकरणात पोलिसांनी काही अधिकाऱ्यांविरुद्ध गुन्हे नोंदविले. राठोड यांच्यासह गोपाळ बोरे विरुद्ध गुन्हा दाखल केला आहे. पोलिसांनी वर्षभरात जवळपास ३० ते ४० लोकांचे जवाब नोंदविले आहेत. या कारवाईने पुन्हा एकदा कृषी खात्यात खळबळ उडाली आहे.