Cotton Seed Sales : खानदेशात कापूस बियाणे विक्री १५ मे पासून

Jalgaon News : पूर्वहंगामी कापूस उत्पादकांची मागणी, कापूस बियाण्यांचा काळाबाजार आदी बाबी लक्षात घेत खते, बियाणे वितरकांच्या असोसिएशनच्या मागणीनुसार प्रशासनाने कापूस बियाणे विक्री १५ मे पासून करण्यासंबंधी पत्र काढले आहे. अशात खानदेशात कृत्रीम जलसाठाधारक शेतकरी आपली पूर्वहंगामी किंवा बागायती कापूस लागवड २० ते ३० मे या कालावधीतच करतील, असे चित्र आहे.

मागील काही वर्षे कापूस बियाणे १ जूनपासूनच विक्री सुरू करण्याची आणि शेतकऱ्यांनी जूनमध्येच पूर्वहंगामी किंवा बागायती कापूस लागवड करावी, अशी प्रशासनाची भूमिका होती. परंतु यात मेच्या मध्यानंतर किंवा २० ते ३० मे या कालावधीत कापूस लागवड अनेक शेतकरी करायचे. बियाणे स्थानिक बाजारात मिळत नसल्याने ते काळ्या बाजारातून आणले जात होते.

यात फसवणुकीचे प्रकारही होत होते. हा प्रकार थांबविण्यासाठी यंदा १५ मे पासून कापूस बियाणे अधिकृतपणे विविध कृषी केंद्रे, निविष्ठा विक्रीच्या दुकानांत मिळणार आहे. परंतु कृषी विभागाने १ जूननंतर लागवडी करण्याच्या केलेल्या आवाहनास शेतकरी प्रतिसाद देतील का, असा प्रश्न आहे.

कारण अनेक शेतकऱ्यांनी कापूस लागवडीसाठी शेत तयार करून त्यात सूक्ष्मसिंचन यंत्रणाही बसविली आहे. फक्त बियाणे आल्यावर लागवडीची कार्यवाही तेवढी राहिली आहे. कापूस लागवड २० ते ३० मे या कालावधीत झाल्यास चांगला लाभ होतो, पुढे क्षेत्र रिकामे करून अन्य पिकेही घेणे शक्य होते, असे शेतकरी मानतात.

परंतु गुलाबी बोंड अळीचे चक्र नष्ट करण्याचे शास्त्रज्ञ व कृषी विभागाचे प्रयत्न यामुळे अपयशी ठरतील असेही दिसत आहे. खानदेशात यंदा साडेआठ लाख हेक्टरवर कापूस लागवड अपेक्षित आहे. जळगाव जिल्ह्यात पाच लाख ५४ हजार हेक्टरवर लागवड होईल, असा अंदाज आहे.