Cotton Market: कापूस बाजार स्थिर! खासगी बाजारात दर ७२०० रुपयांवर

Chandrapur News: बिलिंग सॉफ्टवेअरमध्ये बिघाड असल्याच्या कारणाआड सीसीआयकडून खरेदीला ब्रेक लावण्यात आला आहे. त्यामुळे पैशाची गरज असलेल्या शेतकऱ्यांकडून खासगी बाजारात कापूस विक्रीवर भर दिला जात आहे. सध्या खासगी बाजारात कापसाला सरासरी ७२०० रुपये क्‍विंटलचा दर मिळत असल्याची माहिती व्यापारी सूत्रांनी दिली.

भारतीय कापूस महामंडळाकडून हमीभावाने कापूस खरेदीला सुरुवात करण्यात आली. नोव्हेंबरऐवजी डिसेंबर महिन्यात खरेदीचा मुहूर्त निघाला. त्यानंतर साठवणुकीसाठी जागा नसल्याच्या कारणाआड कापूस खरेदी काही दिवसांकरिता बंद करण्यात आली. ती सुरू होणार तोच बिलिंग सॉफ्टवेअरमध्ये तांत्रिक बिघाड आल्याचे कारण देत पुन्हा खरेदीला स्थगिती देण्यात आली आहे.

त्यामुळे शेतकऱ्यांमध्ये असंतोष वाढला आहे. खरिपात कर्जाची उपलब्धता व्हावी याकरिता शेतकरी कापूस विक्रीवर भर देतात. या पैशातून जुन्या कर्जाची परतफेड करीत नवे कर्ज घेण्यावर शेतकऱ्यांचा भर राहतो. त्यामुळे सद्यःस्थितीत शेतकऱ्यांचा कल कापूस विक्रीवर आहे.

परिणामी, खासगी बाजारात कापसाची आवक वाढल्याचे वरोरा येथील कांचनी फार्मर प्रोड्यूसर कंपनीचे संचालक बालाजी ढोबे यांनी सांगितले. दरात तेजीच्या अपेक्षेने शेतकरी कापसाची साठवणूक करतात. मात्र एप्रिलनंतर कापसाची प्रत अधिक खालावते, कापूस पिवळा पडतो. त्यामुळे अपेक्षित दर मिळत नाही, असेही बालाजी ढोबे सांगतात.

दरम्यान, सीसीआयकडून सुरुवातीला ७५२१ रुपये क्‍विंटल या हमीभावाने कापसाची खरेदी झाली. त्यानंतर कापसाची प्रत अपेक्षित नसल्याचे सांगत हा दर ७४२१ रुपये करण्यात आला. सद्यःस्थितीत ७४२१ रुपये क्‍विंटलनेच खरेदी होत आहे. यापुढील काळात कापसाची अपेक्षित प्रत मिळत नसल्याने दर आणखी कमी होण्याची शक्‍यता असताना तांत्रिक कारणाआड खरेदीच बंद करण्यात आली.

...असा राहिला दराचा कल

डिसेंबर महिन्यात खासगी बाजारात कापूस खरेदीचा दर ७३२५ रुपयांवर दर होता त्यानंतर जानेवारीत ७००० रुपयांवर पोहोचला आता ७२०० रुपये क्‍विंटलने कापसाची खरेदी होत आहे. हिंगणघाट (वर्धा) बाजार समितीत सद्यःस्थितीत ५२५ कापूस गाड्यांची आवक होत त्याला सरासरी ६९०० ते ७३२५ रुपये क्‍विंटलचा दर मिळत आहे. अमरावती बाजार समितीत ७५ क्‍विंटल कापूस आवक होत याला ७१०० ते ७४२५ रुपये क्‍विंटलचा दर मिळाला.