Cotton Market : दरात सुधारणेअभावी कापूस विक्रीसाठी बाजारात

ॲग्रोवन वृत्तसेवा
Cotton Production : वर्धा ः कापसाच्या दरात वाढीची कोणतीच शक्‍यता नसल्याने शेतकऱ्यांकडून कापूस विक्रीसाठी आणला जात आहे. त्यामुळेच बाजारातही आवक वाढती असून पुलगाव बाजार समितीअंतर्गत देवळी व पुलगाव बाजारांत आतापर्यंत सात लाख क्‍विंटल कापसाची आवक नोंदविण्यात आली. एकट्या पुलगाव बाजार समितीची रोजची आवक तीन हजार क्‍विंटलच्या पुढे असल्याची माहिती पुलगाव बाजार समितीचे सचिव दीपक नांदे यांनी दिली.

गेल्या वर्षीच्या हंगामात कापसाचे दर १० ते १२ हजार रुपयांवर गेले होते. त्यामुळे यंदाही कापसाच्या दरातील तेजी कायम राहील, अशी अपेक्षा वर्तविली जात होती. परंतु हंगाम अंतिम टप्यात असतानाही दर वधारले नाहीत. त्यामुळे शेतकऱ्यांना ७४०० ते ७५०० रुपये प्रतिक्विंटलने कापसाची विक्री करावी लागली. आताही याच दराने कापसाचे व्यवहार होत आहेत. कापूसदरात तेजीची शक्‍यता नसल्याचा परिणाम म्हणून शेतकऱ्यांनी कापूस विक्रीसाठी आणला आहे. त्याच्याच परिणामी पुलगाव बाजार समिती व उपबाजार देवळीमध्ये कापसाची आवक वाढती आहे.

पुलगाव बाजारात रोज सरासरी अडीच ते तीन हजार क्‍विंटल आणि त्या पाठोपाठ देवळी उपबाजारात २५० ते ३०० क्‍विंटल कापसाची आवक होत आहे. पुलगावला जिनिंगची संख्या अधिक असल्याने तेथील व्यापारी रोज लिलावात सहभागी होतात. बाजारातच खरेदी होत असल्याने शेतकऱ्यांचा चुकाऱ्याचा प्रश्‍नही निर्माण होत नाही. त्यामुळे शेतकरी देखील बाजारातच कापूस विक्रीला पसंती देत आहेत. परिणामी हंगामात सात लाख क्‍विंटलपेक्षा अधिकची आवक नोंदविली गेली.

पुलगाव बाजार समितीअंतर्गत आठ जिनिंग व्यावसायिकांना खरेदी परवाने देण्यात आले आहेत. देवळी उपबाजाराच्या माध्यमातून तीन परवाने दिले आहेत. मार्केट यार्डमध्ये लिलाव होतो. खाली ताडपत्री आंथरून त्यावर गाडीतील काही किलो कापूस टाकला जातो. त्याआधारे व्यापारी बोली लावतात. त्यामुळे शेतकऱ्यांना दर्जानिहाय चांगला दर मिळत आहे.
- दीपक नांदे, सचिव, बाजार समिती पुलगाव, वर्धा