Kolhapur Heavy Rain : वारणा धरण पाणलोट क्षेत्रात संततधार पाऊस

Sangli News : सांगली जिल्ह्यातील शिराळा तालुक्यात गेल्या तीन दिवसांपासून पावसाचा जोर कायम आहे. वारणा धरण पाणलोट क्षेत्रात अतिवष्टी सुरू असून गेल्या चोवीस तासांत ८५ मिलिमीटर इतक्या पावसाची नोंद झाली आहे.

जिल्ह्यातील इतर तालुक्यात पावसाचा जोर कमी आहे. वारणा धरणातून २४६५ क्युसेकने पाण्याचा विसर्ग सुरू आहे. त्यामुळे वारणा नदीच्या पाण्याच्या पातळीत वाढ झाली आहे.

सांगली जिल्ह्यात गेल्या आठ दिवसांपासून कमी-अधिक पाऊस सुरू आहे. तर गेल्या दोन दिवसांपूर्वी मुसळधार पावसाने हजेरी लावली. दिवसभर ढगाळ वातावरण तर सायंकाळनंतर पावसाचा जोर वाढ आहे. त्यामुळे पुन्हा एकदा मुसळधार पाऊस सुरू असल्याने शेतात पाणी साचून राहिले असल्याने भुईमुग, सोयाबीन या पिकांसह अन्य नुकसान होऊ लागले आहे.

पाऊस भात पिकासाठी उपयुक्त आहे. धरणाचे चार वक्राकार दरवाजे ०.२५ मीटरने उचलून सांडव्यातून १००० तर विद्युत निर्मितीतून १४६५ असा एकूण २४६५ क्युसेकने पाण्याचा वारणा नदीत विसर्ग सुरू आहे. त्यामुळे वारणा नदीच्या पाणीपातळीत वाढ होत आहे. रेठरे-कोकरूड बंधारा पाण्याखाली गेला असल्याने शिराळा व शाहूवाडी तालुक्यातील काही गावांचा जवळचा संपर्क तुटला आहे.

शिराळा तालुक्यातील पावसाचा जोर कमी झाला असून वारणा धरण पाणलोट क्षेत्रात संततधार पाऊस सुरू आहे. तर जिल्ह्याच्या इतर तालुक्यात दुपारपर्यंत हलका पाऊस झाला, दुपारनंतर ढगाळ वातावरण होते.