Swachh Bharat Abhiyan : ‘स्वच्छ भारत’ जागृतीमुळे गावे ओडीएफ प्लस

Palhjar News : जिल्ह्यात स्वच्छ भारत अभियानाची प्रभावी अंमलबजावणी सुरू आहे. अनेक गावे स्वच्छतेच्या बाबतीत आदर्श होत आहेत. जिल्ह्यातील ४७३ ग्रामपंचायतींमधील ८९८ पैकी ७०३ गावे ओडीएफ प्लस मॉडेल झाली आहेत.

१५ व्या वित्त आयोगातील बंधित निधीमधून जास्तीत जास्त निधी स्वच्छतेच्या कामावर खर्च करण्याचे निर्देश पालघर जिल्हा परिषदेचे मुख्य कार्यकारी अधिकारी भानुदास पालवे यांनी गटविकास अधिकारी यांना दिले आहेत.

तसेच तालुकास्तरीय प्लॅस्टिक कचरा व्यवस्थापन प्रकल्प सुरू करण्यात यावेत, तसेच गावपातळीवर स्वच्छतेच्या सुविधा कार्यरत राहण्यासाठी देखभाल-दुरुस्तीकरीता प्राधान्य द्यावे अन्यथा कारवाई करण्यात येईल, अशी तंबीदेखील अधिकारी वर्गाला दिली आहे.

स्वच्छ भारत मिशनचा मुख्य उद्देश ग्रामीण भागातील सर्व गावांत दृष्यमान स्वच्छता ठेवून नागरिकांचे आरोग्यमान उंचावणे, हा आहे. ग्रामपंचायतींनी २०२५-२६ चा गाव कृती आराखडा तयार करताना स्वच्छ भारत मिशन व १५ व्या वित्त आयोगाच्या बंधित निधीतून सार्वजनिक कंपोस्ट पीट, प्लॅस्टिक संकलन शेड, सांडपाणी व्यवस्थापनासाठी स्थिरीकरण तळे, सार्वजनिक शोषखड्डे, सांडपाणी प्रक्रिया केंद्र या कामांना प्राधान्य देण्यात येणार आहे.

जागरूक कुटुंबांचा सत्कार होणार

जिल्ह्यात वैयक्तिक शौचालय, शोषखड्डा अथवा परसबाग, कंपोस्ट खत खड्डा तसेच कचरा वर्गीकरणासाठी हिरव्या व निळ्या रंगाच्या दोन कचराकुंड्या असणाऱ्या कुटुंबांना घनकचरा व सांडपाणी व्यवस्थापनातील उत्कृष्ट कुटुंब म्हणून सन्मानित करण्यात येणार आहे.

सहभागी होण्याचे आवाहन

पालघर जिल्ह्यात ८९८ गावांमध्ये स्वच्छता अभियान जनजागृतीसाठी स्वच्छ माझे अंगण अभियान राबविण्यात येत आहे. हे अभियान २६ जानेवारीपर्यंत राबविण्यात येणार आहे. अभियानात सक्रिय सहभागी होण्याचे आवाहन पालघर जिल्हा परिषदेचे मुख्य कार्यकारी अधिकारी भानुदास पालवे यांनी केले आहे.