Sugarcane Rate : ‘छत्रपती’ने उसाचा दुसरा हप्ता ३०० रुपये द्यावा

Pune News : भवानीनगर (ता. इंदापूर) येथील श्री छत्रपती सहकारी साखर कारखान्याने सन २०२४-२५ च्या गळीत हंगामामध्ये गाळप केलेल्या उसाचा दुसरा हप्ता ३०० रुपये प्रतिटन देवून सभासदांची दिवाळी गोड करा तसेच वार्षिक सर्वसाधारण सभा घेण्यासाठी शेतकरी कृती समितीच्या वतीने छत्रपती कारखान्याच्या अध्यक्ष व संचालक मंडळाला निवेदन देण्यात आले.

भवानीनगर (ता. इंदापूर) येथील श्री छत्रपती सहकारी साखर कारखान्याला वार्षिक सर्वसाधरण सभा घेण्यासाठी ३१ मार्च २०२५ पर्यंतची मुदत वाढ मिळाली आहे. कारखान्याच्या प्रशासनाने वार्षिक सर्वसाधरण सभा घ्यावी तसेच उसाचा दुसरा हप्ता ३०० रुपये प्रतिटन देवून सभासदांची दिवाळी गोड करण्यासाठी छत्रपती कारखान्याचे माजी अध्यक्ष पृथ्वीराज जाचक, अॅड. संभाजी काटे, दिलीप शिंदे, शिवाजी निंबाळकर, सतीश काटे, विठ्ठल पवार, रामचंद्र निंबाळकर, संतोष चव्हाण, दत्तात्रेय ढवाण, बाळासाहेब शिंदे आदींनी कारखान्याचे अध्यक्ष प्रशांत काटे यांना निवेदन दिले.

यावेळी कार्यकारी संचालक अशोक जाधव, हनुमंत करवर उपस्थित होते. यावेळी जाचक यांनी सांगितले की, छत्रपती कारखान्याच्या बाबतीमध्ये दोन चुकीचे ठराव करण्यात आल्यामुळे सभासदांचे मोठे नुकसान झाले आहे. या ठरावाची माहिती योग्य वेळी दिली जाईल.तसेच सहकारखात्याच्या चुकीच्या निर्णयामुळे छत्रपतीच्या सभासदांचे नुकसान होत आहे.रा ज्यामध्ये वाढत चाललेले खासगी साखर कारखाने चितेंचा विषय असल्याचे सांगितले.

जो बसेल तो दर देण्याचा प्रयत्न करणार

कारखान्याचे अध्यक्ष प्रशांत काटे यांनी सांगितले की, सन २०२४-२५ च्या गाळप हंगामामध्ये तीन हजार रुपयांचा पहिली उचल देवून छत्रपती कारखान्याने ऊस दराची कोंडी फोडली होती. सध्या कारखान्याचे बॅलन्स शीट तयार करण्याचे काम सुरू असून जो बसेल तो दर देण्याचा प्रयत्न करणार आहे. कारखान्याची वार्षिक सर्वसाधारण होणार आहे.

निवडणुकीसंदर्भात उच्च न्यायालयामध्ये याचिका दाखल आहेत. निवडणूक न्यायप्रविष्ट आहे. उच्च न्यायालयाच्या आदेशाने निवडणूक कार्यक्रम जाहीर झाला तर लागली तर अडचण येऊ नये म्हणून ३१ मार्च २०२५ पर्यंत मुदतवाढ घेऊन ठेवली आहे. वार्षिक सभा होणारच असून, वार्षिक सभा घेण्यासाठी संचालक मंडळ टाळाटाळ करणार नाही. सभासदांनी गैरसमज करून घेऊ नये असे सांगितले.