CCI Decision : ‘सीसीआय’कडून कापूसदरात प्रति खंडी ५०० रुपये कपात

Nagpur News : आंतरराष्ट्रीय बाजारात कापसाच्या दरात होणाऱ्या घसरणीच्या पार्श्‍वभूमीवर ‘सीसीआय’ने देखील कापसाच्या विक्रीसाठी प्रति खंडी (३५६ किलो रुई) दरात ५०० रुपयांची कपात केली आहे. त्यानुसार अहमदाबादमध्ये मध्यम लांबीच्या (२८ एमएम) कापसाकरिता ५१ हजार ६०० तर अकोल्यामध्ये लांब धाग्याच्या (३० एमएम) कापसाकरिता ५३,६०० रुपयांचा दर आकारला गेला.

सूत्रांनी दिलेल्या माहितीनुसार, सीसीआयकडे २०२३-२४ या वर्षातील साठा त्यासोबतच यंदाच्या हंगामात ३२ लाख गाठींपेक्षा अधिक खरेदी केलेला कापूस आहे. देशांतर्गत बाजारात सीसीआयकडेच कापसाचा सर्वाधिक साठा असल्याने कापसातील तेजी-मंदी ही सीसीआयकडून होणाऱ्या विक्रीवर अवलंबून राहणार आहे.

भारतीय कापूस महामंडळाने (सीसीआय) गुरुवारी (ता. २६) सुमारे ४९०० कापूस गाठींची विक्री केली. त्यातील ३१०० गाठींची विक्री स्पिनींग मिलधारकांना करण्यात आली, तर उर्वरित १८०० गाठींची खरेदी व्यापाऱ्यांनी केली. स्पिनिंग मिलधारकांची मागणी वाढल्याने गुजरातमध्ये कापसाच्या दरात काहीशी सुधारणा अनुभवण्यात आली. अहमदाबादमध्ये शंकर-६ या लांब धाग्याच्या कापूस वाणाचे दर ५३,७०० रुपये प्रति खंडीवर (३५६ किलो रुई) पोहोचले.

पंजाब, राजस्थानमध्ये असा आहे दर

पंजाबमध्ये रुईचा लिलाव दर ५५१० ते ५५२० रुपये प्रति मन (३७.३२ किलो रुई) याप्रमाणे होता. राजस्थानमध्ये हाच दर ५५२० ते ५५८० रुपये प्रति मन असा होता.

देशभरात २.२ लाख कापूस गाठींची आवक

देशभरातील बाजारात २ लाख २ हजार २०० गाठी (प्रति गाठ १७० किलो) याप्रमाणे कापसाची आवक झाली आहे. कापसाला ७५२१ रुपयांचा हमीभाव असून, खुल्या बाजारात कापसाला ६९०० ते ७२०० रुपयांचा दर मिळत आहे. येत्या काळात कापसाचा हाच दर स्थिर राहणार असल्याची माहिती विपणन क्षेत्रातील जाणकारांनी दिली.

२९९ लाख गाठी उत्पादनाचा अंदाज

कृषी मंत्रालयाच्या आकडेवारीनुसार, देशात चालू हंगामात २९९.२६ लाख गाठी इतक्‍या कापसाचे उत्पादनाचा अंदाज आहे. २०२३-२४ या हंगामातील ३२५.२२ लाख गाठीच्या तुलनेत ही उत्पादकता कमी राहणार आहे. दुसरीकडे कॉटन असोसिएशन ऑफ इंडियाने ३०२.२५ लाख गाठीच्या उत्पादनाचा अंदाज वर्तविला आहे.