Bogus Fertilizer : किणीत चार लाखांचे बोगस खत जप्त

Kolhapur News : किणी (ता. चंदगड) येथील प्रियांका ॲग्रो सर्व्हिसेस या खत विक्री केंद्रामध्ये सुमारे चार लाख रुपये किमतीचे १३.५ टन बोगस खत कोल्हापूरच्या भरारी पथकाने जप्त केले.

या प्रकरणी गुजरातमधील क्रॉप्स फर्टिलायझर प्रायव्हेट लिमिटेड मेहसाणा, एसएच ॲग्रो इंड्रस्ट्रीज अहमदाबाद या दोन कंपन्यांसह दुकान मालक आल्पी करुदाद लोबो यांच्यावर येथील पोलिसांत गुन्हा दाखल झाला आहे.

कृषी विभागाच्या भरारी पथकाचे प्रमुख बंडा कुंभार यांनी या दुकानातून पाण्यातील विद्राव्य खतांचे नमुने विश्‍लेषणासाठी घेतले होते. त्यामध्ये या दोन्ही कंपनीच्या खतामध्ये एनपीकेचे प्रमाण नगण्य असल्याचे आढळले.

शिवाय त्यांनी महाराष्ट्र शासनाचा खत विक्री परवाना न घेता विक्री केल्याचे स्पष्ट झाले. त्यांच्यावर खत नियंत्रण आदेश १९८५ व अत्यावश्यक वस्तू अधिनियम १९५५ मधील तरतुदींचा भंग केल्याने गुन्हा दाखल करण्यात आला.

गुणनियंत्रण संचालक विकास पाटील, सहसंचालक बसवराज बिराजदार, अधीक्षक कृषी अधिकारी उमेश पाटील यांच्या मार्गदर्शनाने तंत्र अधिकारी बंडा कुंभार, गुणनियंत्रण निरीक्षक प्रवीण जाधव, रामचंद्र शेळके, विभागीय पथकाचे प्रल्हाद साळुंखे, उपविभागीय कृषी अधिकारी किरण पाटील, कृषी अधिकारी यशोदीप पोळ, सतीश कुंभार यांनी ही कारवाई केली. पोलिस निरीक्षक संतोष घोळवे तपास करीत आहेत.