Pune News : ग्रामीण भागात रोजगार निर्मिती, हवामान बदल कमी करण्यासाठी आणि अनुकूलन मार्गांना चालना देण्यासाठी ‘बाएफ’ संस्थेच्या ग्रामीण नवोन्मेष केंद्रामधील प्रात्यक्षिके देशाच्या विविध भागांमध्ये उपजीविका विस्तारित करण्यास प्रोत्साहित करतील, असे प्रतिपादन केंद्रीय वस्त्रोद्योग मंत्री गिरिराज सिंह यांनी केले.
उरुळी कांचन (जि. पुणे) येथे ‘बाएफ’ संस्थेच्या ग्रामीण नवोन्मेष केंद्राचे उद्‌घाटन रविवारी (ता. २७) केंद्रीय वस्त्रोद्योगमंत्री गिरिराज सिंह यांच्या हस्ते झाले. ग्रामीण भागात अशा प्रकारचे हे पहिलेच केंद्र आहे. या वेळी ‘बाएफ’चे अध्यक्ष डॉ. भरत काकडे, दरभंगाचे (बिहार) आमदार सर्वेश्‍वर प्रसाद सिंह, फाइव्ह-एफ अ‍ॅग्रोइकोलॉजी एलएलपीचे संचालक रवी मदान, संजय अग्रवाल तसेच वस्त्रोद्योग मंत्रालय आणि ‘बाएफ’ संस्थेचे वरिष्ठ अधिकारी उपस्थित होते.
केंद्रीय वस्त्रोद्योग मंत्री गिरिराज सिंह यांनी पंतप्रधानांच्या आत्मनिर्भर भारत या मोहिमेत स्वावलंबी ग्रामीण अर्थव्यवस्था कशी महत्त्वपूर्ण योगदान देऊ शकते या बाबत माहिती दिली. या वेळी त्यांनी ‘बाएफ’ संस्थेच्या संशोधन प्रक्षेत्राला भेट देऊन कॅक्टस व्हॅल्यू चेन, कृषी विज्ञान, ऊर्जा पर्याय, माती समृद्धीकरण, पशुपोषण, पशूआनुवंशशास्त्र आणि जमिनीचा ऱ्हास कमी करणारे पथदर्शी प्रकल्प आदी उपक्रमांची माहिती घेतली.
‘बाएफ’ संस्थेच्या उपक्रमांची माहिती देताना डॉ. भरत काकडे म्हणाले, की ग्रामीण नवोन्मेष केंद्र हे ग्रामीण समुदायांच्या कल्याण आणि सक्षमीकरणाला प्रतिसाद देण्याच्या गरजेतून विकसित झाले आहे. हे केंद्र अक्षय आणि अपारंपरिक ऊर्जा तंत्रज्ञान, बायो-सीएनजी युनिट, संकरित नेपिअर गवत लागवड आणि निवडुंगापासून चारा, अन्न, इंधन, सेंद्रिय खत निर्मिती तसेच व्हेगन लेदर युनिट, पशुधन आणि दुग्ध व्यवस्थापन प्रात्यक्षिकांवर माहिती, संसाधने आणि प्रशिक्षणासाठी ज्ञान केंद्र म्हणून काम करणार आहे. शाश्‍वत हवामान-स्मार्ट कृषी पद्धतींना प्रोत्साहन देण्यासाठी कृत्रिम बुद्धिमत्तेवर आधारित तंत्रज्ञानासह नैसर्गिक आणि सेंद्रिय शेती पद्धतींवर देखील लक्ष केंद्रित करण्यात आले आहे.
कार्यक्रमाला वस्त्रोद्योग मंत्रालयातील वरिष्ठ अधिकारी तसेच बाएफ संस्थेतील डॉ. जयंत खडसे, राकेश वॉरियर, प्रमोदकुमार ताकवले, डॉ. विठ्ठल कौठाळे, डॉ. सचिन जोशी, डॉ. शिवाजी सोनटक्के, डॉ. राहुल बहुलीकर, सदाशिव निंबाळकर तसेच टिळेकरवाडी ग्रामपंचायतीचे सरपंच आणि सदस्य उपस्थित होते.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.