Babhulgaon APMC : बाभूळगाव बाजार समिती सभापतींचा राजीनामा

Yavatmal News : कृषी बाजार समितीचे सभापती राजेंद्र पांडे यांनी राजीनामा दिल्याने खळबळ उडाली आहे. बाजार समितीवर महाविकास आघाडीची एकहाती सत्ता आहे, असे असतानाही पांडे यांनी जिल्हा उपनिबंधक नानासाहेब चव्हाण यांच्याकडे राजीनामा दिल्याने चर्चांना उधाण आले आहे.

तालुक्यातील सहकार क्षेत्रात कृषी उत्पन्न बाजार समिती अत्यंत महत्त्वाची आहे. दोन वर्षांपूर्वी झालेल्या बाजार समितीच्या निवडणुकीत महाविकास आघाडीने एकतर्फी विजय मिळविला होता. १८ जागांपैकी १५ जागांवर महाविकास आघाडीचे संचालक निवडणूक आले. केवळ तीन जागा भाजप समर्थित पॅनेलला मिळाल्या.

सर्वांना सोबत घेऊन चालणारे नेतृत्व म्हणून सभापतिपदी काँग्रेसचे राजेंद्र पांडे यांना विराजमान करण्यात आले. आगामी काळात स्थानिक स्वराज्य संस्थेच्या निवडणुका होऊ घातल्या आहेत. यामुळे तालुक्यात काँग्रेसची पर्यायाने महाविकास आघाडीची ताकद वाढविणे गरजेचे आहे.

असे असताना काँग्रेस पदाधिकारी राजीनामा देत असल्याने अनेक चर्चांना उधाण आले आहे. नुकत्याच झालेल्या विधानसभा निवडणुकीतही काँग्रेसला पराभवाचा सामना करावा लागला. बाजार समिती सभापतींनी राजीनामा दिल्याने खळबळ उडाली आहे.

राजीनामा देण्यामागे वैयक्तिक कारण सांगितले जात असले तरी कामकाजात आयात स्वपक्षीयांकडून वाढता हस्तक्षेप हेच राजीनामा देण्याचे कारण असल्याची चर्चाही सहकार क्षेत्रात आहे.