Solapur ZP : जि. प.च्या प्रशिक्षणार्थ्यांची ‘सीईओं’कडून हजेरी

Solapur News : मुख्यमंत्री युवा कार्य प्रशिक्षण योजनेतून जिल्हा परिषद व पंचायत समित्यांच्या स्तरावर एकूण ६९९ विद्यार्थ्यांना (इयत्ता बारावी ते पदव्युत्तर पदवी उत्तीर्ण) सहा महिने प्रशिक्षण दिले जाणार आहे.

त्यासाठी शासनाकडून दरमहा विद्यावेतन देखील दिले जाणार आहे. सध्या जिल्हा परिषदेच्या विविध विभागांमधील कार्यरत प्रशिक्षणार्थींची मुख्य कार्यकारी अधिकारी कुलदीप जंगम यांनी भेट घेऊन त्यांच्या कामाची माहिती घेतली. याशिवाय गैरहजर राहिलेल्यांचाही आढावा घेतला.

सोलापूर जिल्हा परिषदेत डिप्लोमा ॲण्ड सिव्हिल इजिनिअरिंग असिस्टंटचे शिक्षण पूर्ण असलेल्यांना साईट सुपरवायझर प्रशिक्षणार्थी म्हणून नेमणूक देण्यात आली आहे. जिल्हा परिषदेत १३ विद्यार्थ्यांना प्रशिक्षणार्थी म्हणून घेण्यात आले आहे. तसेच इलेक्ट्रीकल इंजिनिअर जनरल या विद्यार्थ्यांनाही त्याच पदासाठी प्रशिक्षणार्थी म्हणून घेतले आहे.

याशिवाय पदवी, एमएससीआयटी, टायपिंग झालेल्या पदवीधर व अन्य शैक्षणिक पात्रता पूर्ण केलेल्या ६०० विद्यार्थ्यांना जिल्हा परिषदेतील विविध विभागांमध्ये सहा महिने प्रशिक्षणार्थी म्हणून अनुभव घेता येणार आहे. त्याअंतर्गत अनेकांना नियुक्तीपत्रे देण्यात आली आहेत.

इयत्ता बारावी (विज्ञान) झालेल्या ७२ जणांना आरोग्य विभागाअंतर्गत प्रशिक्षणार्थी म्हणून नेमणुका दिल्या आहेत. शैक्षणिक पात्रतेनुसार सर्वांना प्रशिक्षणार्थी म्हणून नियुक्तीपत्रे मिळाली आहेत का, प्रशिक्षणार्थी नियमित येतात का, कोणी गैरहजर राहतात का, याची माहिती मंगळवारी श्री. जंगम यांनी घेतली. त्याचवेळी त्यांनी प्रशिक्षणार्थींच्या अडचणीही जाणून घेतल्या. प्रशिक्षणार्थी काळात परस्पर गैरहजर राहणाऱ्यांना नोटिसा बजावण्याचेही आदेश त्यांनी यावेळी दिले.