Kolhapur News : खत विक्रेत्यांनी खताची विक्री करताना शेतकऱ्यांना दुय्यम खत खरेदीची सक्ती करू नये, तसेच खत उत्पादक कंपन्यांनी कोणत्याही परिस्थितीत लिंकिंग होणार नाही याची दक्षता घ्यावी. तसेच लिंकिंग झाल्याचे आढळल्यास कृषी विभागाच्या अधिकाऱ्यांमार्फत निविष्ठा विक्री केंद्रांची तपासणी करून कायद्यानुसार कारवाई करण्यात येईल, असे निर्देश जिल्हाधिकारी अमोल येडगे यांनी दिले.
जिल्हाधिकारी कार्यालयात जिल्हाधिकारी श्री. येडगे यांच्या अध्यक्षतेखाली कृषी विभागाचे अधिकारी, खत उत्पादक कंपन्या आणि निविष्ठा विक्रेत्यांसमवेत निविष्ठा सनियंत्रण व अन्य बैठका पार पडल्या, त्या वेळी ते बोलत होते.
जिल्हा परिषदेचे मुख्य कार्यकारी अधिकारी कार्तिकेयन एस., पोलिस उप अधीक्षक सुवर्णा पत्की, जिल्हा अधीक्षक कृषी अधिकारी जालिंदर पांगरे, ‘आत्मा’च्या प्रकल्प संचालक रक्षा शिंदे, करवीरचे उपविभागीय कृषी अधिकारी अरुण भिंगारदेवे, कृषी विकास अधिकारी सारिका रेपे, मोहीम अधिकारी सुशांत लव्हटे, जिल्हा गुणवत्ता नियंत्रक निरीक्षक संभाजी शेणवे आदी उपस्थित होते.\
जिल्हाधिकारी येडगे म्हणाले, की जिल्ह्यातील निविष्ठा विक्रेत्यांना खतपुरवठा करताना कंपन्यांनी कोणत्याही प्रकारचे लिंकिंग करू नये, तसेच मुख्य खतांसमवेत इतर कोणतेही दुय्यम उत्पादन विक्री होऊन लिंकिंगचा चुकीचा संदेश जाणार नाही, याची खबरदारी घ्यावी. खत उत्पादक कंपनीने खत विक्रेत्यांच्या मागणीप्रमाणे पुरवठा करावा. शेतकऱ्याने कोणते खत खरेदी करावे याचे स्वातंत्र्य शेतकऱ्यालाच राहील, याची दक्षता खत उत्पादक कंपन्या आणि खत विक्रेत्यांनी घ्यावी.
शेतकऱ्यांच्या इच्छेव्यतिरिक्त कोणत्याही खताची खरेदी बंधनकारक नसल्याच्या आशयाचे बॅनर बनवून खत उत्पादक कंपन्यांनी खत विक्रेत्यांमार्फत या बाबीचा प्रचार, प्रसार करावा. कृषी विभागाने खत उत्पादक कंपन्या, घाऊक विक्रेते आणि किरकोळ विक्रेते या सर्वांचा मागणीनुसार पुरवठा होत असल्याची तपासणी करावी.
खत वाहतुकीविषयीचे प्रश्न तसेच शासन स्तरावरील प्रश्न खरीप बैठकीवेळी पालकमंत्री यांच्याकडे मांडण्यात येतील. सर्व कृषी सेवा केंद्र धारकांनी शेतकऱ्यांना सहकार्य करावे. कृषी विकास अधिकाऱ्यांनी प्रत्येक महिन्याच्या पहिल्या आठवड्यात खत उत्पादक कंपन्या व विक्रेत्यांची बैठक घेऊन जिल्ह्यात सर्व तालुक्यांना सम प्रमाणात खताचा पुरवठा होईल, याची खबरदारी घ्यावी, अशी सूचना त्यांनी केली. जिल्हा कृषी निविष्ठा सनियंत्रण बैठकीच्या सुरुवातीला सारिका रेपे यांनी खताचा पुरवठा व उपलब्ध साठा याबाबत माहिती दिली. खत विक्री करताना येणाऱ्या अडचणी खत विक्रेत्यानी मांडल्या.
‘नॅशनल मिशन ऑन नॅचरल फार्मिंग''ची जिल्ह्यात प्रभावी
शेतकऱ्यांना रसायनमुक्त शेती करण्यास आणि नैसर्गिक शेतीचा आवाका वाढविण्यास उपयुक्त असलेल्या केंद्र शासनाच्या ‘नॅशनल, मिशन ऑन नॅचरल फार्मिंग’ योजनेची जिल्ह्यात प्रभावी अंमलबजावणी करण्यात येणार आहे.
या योजनेअंतर्गत जिल्ह्यासाठी ४० गटांचा लक्ष्यांक असून २ हजार हेक्टर क्षेत्रावर या योजनेची अंमलबजावणी होणार आहे. याकरिता ५ कोटी ९९ लाख रुपयांच्या वार्षिक कृती आराखड्यास मान्यता देण्यात आली आहे, अशी माहिती जिल्हाधिकारी अमोल येडगे यांनी दिली.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.