Jalgaon News : खानदेशात पूर्वहंगामी किंवा बागायती कापूस लागवड मागील मे व जूनमध्ये झाली होती. यातील कमाल क्षेत्र रिकामे झाले असून, त्यात रब्बी पिके उभी झाली आहेत. तसेच अत्यल्प क्षेत्रात यंदा फरदड किंवा खोडवा कापूस पीक दिसत आहे.
कापूस लागवडीत खानदेशात यंदा घट येईल, अशी स्थिती होती. यानुसार कापूस लागवडीत मोठी घट झाली. बागायतदार शेतकऱ्यांनी क्षेत्र कमी करून अन्य पिकांच्या लागवडीचे नियोजन केले. काहींनी लागवड न करण्याचे निश्चित केले.
यामुळे पूर्वहंगामी कापूस लागवड कमी झाली होती. एकूण बागायती कापूस लागवड दोन लाख हेक्टरवर असते. परंतु यंदा ही लागवड सुमारे २० हजार हेक्टरने कमी झाली. एकूण कापूस लागवड खानदेशात पाच लाख ६५ हजार हेक्टरवर अपेक्षित असते. यंदा ही लागवड पाच लाख ११ हजार हेक्टरवर झाली होती.
पूर्वहंगामी कापूस लागवडीसाठी अनेकांनी नवनवे कापूस बियाणे, वाण आणले. लागवड केली. पण उत्पादन यंदाही कमी आले. रोगराई वाढली. पीक परवडत नव्हते. दरही कमीच आहेत. यामुळे कापूस पिकाखालील क्षेत्र रिकामे करण्यास डिसेंबरमध्ये वेग आला. आजघडीला मोठ्या क्षेत्रातील कापूस पीक काढून क्षेत्र रिकामे झाले व त्यात रब्बी हंगाम अनेक भागात उभा आहे.
पाच लाख ११ हजार हेक्टरपैकी सुमारे साडेचार लाख हेक्टर क्षेत्रातील कापूस पीक काढण्यात आल्याचा अंदाज आहे. या शेतात कमाल शेतकऱ्यांनी पेरणी केली आहे. तर ज्यांच्याकडे जलसाठे कमी आहेत, त्यांनी क्षेत्र तापू देण्यावर भर दिला आहे. खोल नांगरणी करून घेतली आहे. अनेकांनी रोटाव्हेटरने शेत भुसभुशीत करून घेतले. पूर्वहंगामी लागवडीसाठी १०० टक्के शेतकरी ठिबकचा खानदेशात उपयोग करतात.
यामुळे या क्षेत्रातील ठिबकचा उपयोगही रब्बीसाठी केला जात आहे. खानदेशात मागील तीन-चार दिवसात उष्णता कमी अधिक होत आहे. यामुळे अशा स्थितीत रब्बी पिकांचे सिंचन करण्यासाठी या क्षेत्रातील ठिबकचा चांगला व कार्यक्षम उपयोगही होत आहे.
अनेकांनी हरभरा, गहू पेरणी केली आहे. काहींनी पपई लागवड केली आहे. एकट्या जळगाव जिल्ह्यात यंदा रब्बीचे क्षेत्र सुमारे ८५ हजार हेक्टरने वाढले असून, एकूण पेरणी तीन लाख १५ हजार हेक्टरपेक्षा अधिक क्षेत्रात झाली आहे. कारण पाऊसमान चांगले राहिल्याने त्यात रब्बी हंगाम घेणे शक्य झाले.
फरदड कापूस पिकातून पुढील हंगामात रोगराई वाढते. गुलाबी बोंड अळीचे जीवनचक्र नष्ट करण्यात अडचणी येतात, असे आवाहन अनेकदा तज्ज्ञ, अधिकारी यांनी केले होते. यानुसार अनेक शेतकऱ्यांनी यंदा फरदड कापूस पीक टाळल्याचे दिसत आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.