Agricultural Electricity : ट्रान्सफॅार्मर मंजूर होऊनही बसवला नाही, शेतकऱ्यांची पिके जळू लागली

ॲग्रोवन वृतसेवा

Solapur News : मोहोळ, जि. सोलापूर ः पेनूर (ता. मोहोळ) येथील महावितरणच्या विद्युत उपकेंद्रात पाचएमव्हीएचा ट्रान्सफॅार्मर गेल्या आठ ते नऊ महिन्यांपूर्वी मंजूर झाला आहे. मात्र तो अद्यापही सुरू न झाल्याने पापरी, कोन्हेरीसह अन्य गावातील शेतकऱ्यांना त्याचा मोठा फटका बसत आहे. तो ट्रान्सफॉर्मर लवकरात लवकर बसविला तर शेतकऱ्यांची पिके जळण्यापासून वाचणार आहेत. कमी दाबाने व विद्युत पुरवठा खंडित होण्याने शेतकऱ्यांच्या विद्युत मोटारी जळण्याचे प्रमाण वाढले आहे.

मोहोळ तालुक्यातील पेनूर हे विद्युत उपकेंद्र ‘हेवीवेट’ म्हणून ओळखले जाते. या पेनूर उपकेंद्राच्या अधिपत्या खाली नऊ गावे येतात. आष्टी तलाव, उजनी डावा कालवा व आष्टी उपसा सिंचन योजना या पाणी स्त्रोतामुळे बागायती क्षेत्र विस्तारले आहे. परिणामी या भागात शेतकऱ्याकडून विजेची वाढती मागणी होत आहे. चालू वर्षी पेनूर उपकेंद्राने वसुली जिल्ह्यात वरचा क्रमांकही पटकावला आहे. सध्या तापमानात मोठी वाढ झाली आहे. पारा जवळपास ४० ते ४२ अंशावर असतो.

सध्या शेतकऱ्यांच्या शेतात ऊस, मका, भुईमूग या पिकासो द्राक्ष, डाळिंब, पेरू, सीताफळ या फळबागा मोठ्या प्रमाणात आहेत. गेल्या साधारण दोन महिन्यापासून शेतकऱ्यांना रात्री बारा ते सकाळी आठ पर्यंत विद्युत पुरवठा केला जातो.

मंजूर असलेला ट्रान्सफॉर्मर लवकर बसवला, तर शेतकऱ्यांचे होणारे नुकसान टाळणार आहे व सुरळीत वीजपुरवठा होणार आहे. गेल्या आठ ते नऊ महिन्यापूर्वी मंजूर झालेला ट्रान्सफॉर्मर अद्यापही का बसवला नाही, याबाबत प्रश्न उपस्थित होत आहे. आधीच अडचणीत असलेला शेतकरी जादा अडचणीत आला आहे.

पेनूर चा ट्रान्सफॉर्मर गेल्या आठ ते नऊ महिन्यापूर्वीच मंजूर झाला आहे. आतापर्यंत तो बसवून, चालू व्हायला पाहिजे होता. पण झाला नाही, मी अधिकाऱ्यांना विचारणा करून तो प्रश्न मार्गी लावतो.

- यशवंत माने, माजी आमदार, मोहोळ

या ट्रान्सफॉर्मर संदर्भात तातडीने चौकशी करून तो लवकरात लवकर कसा बसवता येईल व शेतकऱ्यांचे होणारे नुकसान टाळण्यासाठी प्रयत्न करणार आहे.

- राजू खरे, आमदार, मोहोळ