CM Vayoshree Scheme : मुख्यमंत्री वयोश्री योजनेचा लाभ घेण्याचे आवाहन

Nagar News : मुख्यमंत्री-माझी लाडकी बहीण योजनेला जिल्ह्यात महिला लाभार्थ्यांनी प्रचंड प्रतिसाद दिला. या योजनेच्या यशस्वितेनंतर जिल्हाधिकारी सिद्धाराम सालीमठ व जिल्हा परिषदेचे मुख्य कार्यकारी अधिकारी आशिष येरेकर यांनी मुख्यमंत्री वयोश्री योजना व मुख्यमंत्री तीर्थदर्शन योजनेसाठी शनिवारी व रविवारी दोन दिवस जिल्ह्यातील सर्व गावांमध्ये यशस्वीपणे कॅम्प घेण्यासाठी नियोजन केलेले आहे.

मुख्यमंत्री वयोश्री योजनेकरिता तहसीलनिहाय १५ हजार अर्जाप्रमाणे जिल्ह्यात दोन लाख पात्र अर्ज घेण्याबाबत यंत्रणांना आदेश दिले आहेत.

मुख्यमंत्री योजनेअंतर्गत ६५ वर्षांवरील ज्चेष्ठ नागरिकांना विविध सहाय्यभूत साधने घेण्याकरिता ३ हजार रुपयांचे अर्थसाह्य करण्यात येणार आहे. या योजनेचा लाभ घेण्यासाठी पात्र संबंधितांकडून अर्ज भरून घेण्याकरिता दोन दिवसांच्या शिबिराचे आयोजन प्रत्येक गावामध्ये करण्यात आले आहे.

या कामासाठी जिल्हा परिषदेचा ग्रामपंचायत विभाग व आरोग्य विभाग, समाजकल्याण विभाग, महसूल विभाग व नगरपालिका प्रशासन विभागाचे सर्व अधिकारी, कर्मचारी गावोगावी जाऊन मुख्यमंत्री वयोश्री योजना व मुख्यमंत्री तीर्थ दर्शन योजनेचे अर्ज भरून घेत आहेत.

जिल्हा परिषदेचा ग्रामविकास विभाग, आरोग्य विभाग, नगरपालिका प्रशासन यांच्यासह सर्व उप विभागीय अधिकारी, तहसीलदार, गटविकास अधिकारी, तालुका आरोग्य अधिकारी, तालुकास्तरीय प्रमुख कॅम्प यशस्वीतेसाठी प्रत्यक्ष भेटी देत आहेत. पात्र लाभार्थ्यांनी या योजनेचा लाभ घेण्याचे आवाहनही जिल्हाधिकारी श्री. सालीमठ व मुख्य कार्यकारी अधिकारी आशिष येरेकर यांनी केले आहे.