Sangli APMC : सांगली बाजार समिती सेस गळतीची होणार चौकशी

Sangli News : सांगली कृषी उत्पन्न बाजार समितीमधील सेस, भाडे वसुलीमध्ये अनियमितता असल्याबाबतची तक्रार स्वतंत्र भारत पक्षाच्या वतीने करण्यात आली आहे, या तक्रारीची दखल घेऊन बाजार समितीमधील सेस गळतीची चौकशी करण्याचे आदेश जिल्हा उपनिबंधक मंगेश सुरवसे यांनी उपनिबंधक सहकारी संस्था मिरज यांना दिले आहेत.

बाजार समितीमध्ये इतर पेठेतून मका, खपली, सोयाबीन इत्यादी शेतीमाल मिरज दुय्यम बाजारात येतो. हंगामात दररोज सुमारे साधारण शंभर गाड्या मक्याची आवक असते. त्याबाबत आवक नोंदणीवही मिरज बाजार आवारात व वसुली रजिस्‍ट्रर सांगली बाजार समितीत ठेवले आहे.

यावरून सेस वसुलीचा मेळ लागत नाही. धान्य व्यापारी, मका, खपली, मिरची खरेदीदारांची गेल्या तीन वर्षांची तपासणी करावी. हळद, बेदाणा, धान्य व्यापारी इत्यादींची लेखापरीक्षण व जीएसटी रिपोर्टप्रमाणे तपासणी केली जात नाही.

बाजार समितीच्या अधिकृत नोंदीप्रमाणे असलेलीच बिले तेवढी बाजार समितीकडे येतात. व्यापारी बिले देत नसल्यामुळे समितीच्या उत्पन्न घटते. समितीचे लाखो रुपये नुकसान होते. भाडेकरूंकडून प्लॉटधारकांचे परवाना नूतनीकरण केले जात नाही. व्यापाऱ्यांकडे परवाना नाही; मात्र व्यवसाय सुरू आहे.