Ambit Dam : अकोले तालुक्यातील आंबीत धरण भरले

Nagar Rain Update : अकोले तालुक्यातील मुळा, भंडारदरा पाणलोट क्षेत्रात मुसळधार पाऊस सुरू आहे. जोरदार पावसामुळे तालुक्यातील मुळा नदीवरील आंबीत लघुपाटबंधारे तलाव बुधवारी (ता. २८) पूर्ण क्षमतेने भरले. त्यामुळे भंडारदरा पाणलोटातील तसेच नगर जिल्ह्यातील यंदाच्या पावसाळ्यात भरलेले हे पहिले धरण आहे.

अकोले तालुक्यातील आंबीत प्रकल्पाची साठवण क्षमता १९३ दशलक्ष घनफूट आहे. यंदा दरवर्षीच्या तुलनेत दहा ते पंधरा दिवस उशिराने पाऊस सुरू झाला. दोन दिवसांपासून सुरू असलेल्या पावसामुळे मुळा पाणलोट क्षेत्रातील ओढे-नाले दुथडी भरून वाहत असून, शेतीच्या कामांना वेग आला आहे.

जलाशयांत पाण्याची आवक वाढत आहे. वाकी जलाशयात पाण्याची आवक सुरू झाली असून, कृष्णवंती नदी वाहती झाली आहे.

भंडारदरा जलाशयात ५२३६ दशलक्ष घनफूट (४७.४३ टक्के) पाणीसाठा असून, त्यातून ८३७ क्यूसेकने विसर्ग सुरू आहे. जलाशयात ७० दशलक्ष घनफूट पाणी आले आहे. वाकी जलाशयात ४६.२१ दशलक्ष घनफूट पाणी (४१.०२ टक्के) आहे.

यंदा आंबीत लवकर भरले, भंडारदरा धरणातही पाण्याची आवक सुरु झाल्याने दरवर्षीच्या तुलनेत भंडारदरा लवकर भरण्याची शक्यता व्यक्त केली जात आहे.