Akkalkot Market Committee Election : अक्कलकोट बाजार समितीला आर्थिक खाईत लोटणाऱ्यांना हद्दपार करा

Akkalkot Market Election : सहकाराचे नाव घ्यायचे आणि आपल्या ताब्यात असलेल्या प्रत्येक सहकारी संस्थेत स्वतःचे आर्थिक हित साधत त्या संस्था डबघाईला आणल्याचा आरोप करीत या भस्मासुराला बाजार समिती निवडणुकीतून (Akkalkot Market Committee Election) हद्दपार करा, असे आवाहन अक्कलकोट कृषी उत्पन्न बाजार समितीचे माजी सभापती मल्लिकार्जुन पाटील यांनी व्यक्त केले.

अक्कलकोट बाजार समितीच्या निवडणुकीच्या संदर्भात सर्वपक्षीय आघाडीच्या वतीने आयोजित पत्रकार परिषदेत ते बोलत होते. मल्लिकार्जुन पाटील यांनी खत साठा, मुदत ठेव रक्कम यावरून गंभीर आरोप तत्कालीन सभापती व उपसभापती यांच्यावर केले. या उलट प्रशासक असताना मार्केट कमिटीला वीस लाख रुपयांचा नफा झाल्याचा दावा त्यांनी केला.

२०१० ते २०१५ या माझ्या संचालक मंडळाच्या कार्यकाळात बाजार समितीत व्यापारी आणि मार्केट कमिटीच्यावतीने दर सोमवारी शेतकरी बांधवांना मोफत जेवणाची सोय केली गेली होती.

तसेच दुष्काळात जिल्हाधिकाऱ्यांच्या विनंतीस मान देऊन बासलेगाव, हंजगी व सांगवी या तलावातून गाळ काढण्यास मदत केली गेली. त्याचप्रमाणे २००० लोकसंख्येपेक्षा मोठ्या गावात सिमेंटच्या टाक्या ग्रामपंचायतच्या माध्यमातून भेट दिल्या गेल्या.

बाजार समितीच्या इतिहासात पहिल्यांदाच हमीभाव केंद्र सलग चार वर्षे सुरू ठेवून शेतकऱ्यांच्या मूग, उडीद, हरभरा व मका इत्यादी पिकांना आमच्या कार्यकाळात योग्य दर दिला गेला.

याशिवाय केंद्र शासनाच्या मदतीने बाजार समितीत एकूण ४००० टन क्षमतेची दोन गोदाम धान्य साठवण्यासाठी बांधली गेली. तसेच ८० टन वजन करता येईल इतके क्षमतेचे वेब ब्रिज तयार केले गेले.

शेतकऱ्यांना मोफत बी बियाण्याचे वाटप करण्यात आले सर्व ग्रामपंचायत सदस्य, सोसायटी सदस्य, व्यापारी व हमाल तोलार बांधवांनी आमच्या पाठीमागे खंबीरपणे उभे राहावे, असे आवाहन मल्लिकार्जुन पाटील यांनी केले.

या पत्रकार परिषदेस दत्ता शिंदे, आंनद तानवडे, मल्लिकार्जुन काटगाव, संजय देशमुख, तुकाराम बिराजदार, शिवयोगी लाळसंगी, व्यंकट मोरे, बसवराज तानवडे, लाला राठोड, रामचंद्र अरवत, सुरेश गड्डी, कपिल शिंदे आदींची उपस्थिती होती.