Ahilyadevi Holkar Memorial : अहिल्यादेवी होळकर स्मारकाचे काम १५ जुलैपर्यंत पूर्ण करा

Solapur News : पुण्यश्लोक अहिल्यादेवी होळकर सोलापूर विद्यापीठात निर्माण होत असलेल्या पुण्यश्लोक अहिल्यादेवी होळकर स्मारकाचे काम १५ जुलैपर्यंत पूर्ण करण्याचे आदेश पालकमंत्री जयकुमार गोरे यांनी सार्वजनिक बांधकाम विभागाच्या अधिकाऱ्यांना दिल्या. याचबरोबर विद्यापीठाच्या वर्धापन दिनी १ ऑगस्ट २०२५ रोजी स्मारक उद्घाटनाचा निर्णयही यावेळी घेण्यात आला.

ग्रामविकास मंत्री गोरे यांनी पुण्यश्लोक अहिल्यादेवी होळकर सोलापूर विद्यापीठास भेट देऊन पुण्यश्लोक अहिल्यादेवी होळकर स्मारक कामाची पाहणी केली. यावेळी कुलगुरू प्रा. डॉ. प्रकाश महानवर यांनी पालकमंत्री गोरे यांचे स्वागत करून त्यांना स्मारक कामाची माहिती दिली.

यावेळी आमदार देवेंद्र कोठे, प्र-कुलगुरू प्रा. लक्ष्मीकांत दामा, प्रभारी कुलसचिव डॉ. अतुल लकडे, राजाभाऊ सरवदे, प्रा. देवानंद चिलवंत, रोहिणी तडवळकर, माऊली हळणवर, शिवाजी कांबळे, शिवाजी बंडगर, अमोल कारंडे, सोमेश्वर क्षीरसागर, सुभाष मस्के, नागेश वाघमोडे उपस्थित होते.

यावेळी कुलगुरू प्रा. महानवर यांनी स्मारक व विद्यापीठाच्या विविध मागण्यासंदर्भात पालकमंत्री गोरे यांना निवेदन सादर केले. यावेळी बोलताना पालकमंत्री गोरे म्हणाले, पुण्यश्लोक अहिल्यादेवी होळकर स्मारकासाठी कोणत्याही प्रकारचा निधी कमी पडू देणार नाही. निधीची कमतरता भासल्यास जिल्हा नियोजन समितीमधून त्यासंदर्भात तरतूद करू. १५ जुलै पर्यंत काम पूर्ण करून १ ऑगस्टरोजी स्मारकाचा उद्घाटन करू, असेही ते यावेळी म्हणाले.

जयंतीवर्षानिमित्त ५० लाखाचा निधी

पुण्यश्लोक अहिल्यादेवी होळकर यांची ३०० वी जयंती वर्ष असून, वर्षभर विद्यापीठाच्यावतीने जिल्हाभरात विविध कार्यक्रम राबविण्यासाठी कुलगुरू प्रा. डॉ. महानवर यांनी निधीची मागणी केली. यावेळी तत्काळ पालकमंत्री जयकुमार गोरे यांनी जिल्हा नियोजन समिती मधून ५० लाखांचा निधी जाहीर केला.