Agriculture Exhibition : नवनवीन प्रयोगासाठी कृषी प्रदर्शन उपयुक्त ठरेल

Pandharpur News : पारंपरिक शेतीबरोबर नवनवीन, अत्याधुनिक शेतीतून उत्पादन घेतल्यास बळिराजा समृद्ध होईल. शेतकऱ्यांनी त्याच मेहनतीत दुप्पट उत्पादन देणाऱ्या प्रजातींची लागवड करावी.

अशा नवनवीन प्रयोगांची माहिती शेतकऱ्यांपर्यंत पोचविण्यासाठी हे प्रदर्शन उपयुक्त ठरेल, असा विश्वास मुख्यमंत्री एकनाथ शिंदे यांनी गुरुवारी (ता. २९) येथे व्यक्त केला.

कृषी विभागाच्यावतीने आयोजित कृषी पंढरी प्रदर्शन व तृणधान्य महोत्सव २०२३ कार्यक्रमात ते बोलत होते.

पंढरपूर कृषी उत्पन्न बाजार समिती आवारात आयोजित या कार्यक्रमास वैद्यकीय शिक्षणमंत्री गिरीश महाजन, खासदार डॉ. श्रीकांत शिंदे, आमदार भरत गोगावले, जिल्हाधिकारी मिलिंद शंभरकर, जिल्हा परिषदेचे मुख्य कार्यकारी अधिकारी दिलीप स्वामी, जिल्हा अधीक्षक कृषी अधिकारी दत्तात्रय गावसाने, आत्माचे प्रकल्प संचालक मदन मुकणे आदी उपस्थित होते.

शासकीय महापूजेवेळी आपण विठुरायाला बळिराजाच्या समृद्धीसाठी साकडे घातले असल्याचे सांगून श्री. शिंदे म्हणाले, बळिराजाच्या हिताचे अनेक निर्णय घेतले आहेत. शेती आणि शेतकऱ्यांसाठी जलयुक्त शिवार २.०, नमो शेतकरी महासन्मान निधी योजना, केवळ एक रुपयात पीकविमा, उत्पन्नवाढीसाठी महाकृषी विकास अभियान आदी योजना सुरू केल्या आहेत.